- Publika iha: 18 Fevereiro 2013
Alokasaun Orsamentu Jeral Estadu 2013 ba area saude no edukasaun ne’ebe aloka deit 12 pursentu, tuir Organizasaun La’o Hamutuk katak sei la resolve problema rekursu humanu iha Timor-Leste. Tuir Peskizador La’o Hamutuk (LH), Juvinal Dias katak ho alokasaun orsamentu ne’ebe ki’ik ba area rua ne’e maka sei sai obstaklu ba Timor-Leste atu atinji Milenium Development Goal’s (MDG).
“Infelismente Timor-Leste aloka deit 12 pursentu deit, no hasusar liu ita atu atinji milenium development goal,” preokupa Peskizador LH Dias, (01/02), iha Bebora, Dili.
Peskizador LH ne’e halo komparasaun ho tinan kotuk (2012) setor rua ne’e gasta deit 11 pursentu, enkuantu ba tinan ida ne’e 12%, maske sa’e oituan, maibe klaru katak seidauk sufsiente atu rezolve problema iha area rua ne’e.
Nia dehan, iha nasaun sira ne’ebe atinji ona MDG iha setor saude no edukasaun, sira aloka minimu 29% hosi sira nia orsamentu iha setor sira ne’e.
Entretantu Prezidenti Komisaun F,Deputadu Virgilio Hornai ne’ebe tarata asuntu Edukasaun no Saude rekonese katak,infraestrutura baziku eskola nian barak mak la iha kondisaun.
“Hau hanoin to’o 15 pursentu bele resolve problema hanesan hadia infraestrutura bazika, fasilidade eskola, saneamentu inklui mos fo nutrisaun diak ba labarik sira,” dehan Deputadu ne’e.
Iha orsamentu jeral do estadu 2013 Ministeriu da edukasaun propoin $ 91,827 mil, tuir planu orsamentu ne’e sei fahe ba area despejas no ba bens servisu nian inklui ba ir abe dezenvolvimentu.
Ministru Edukasaun,Bendito Freitas, esklarese katak, area despejas espesifika ba salariu vensimentu hamutuk kuarenta sete miloens kuatru mil dolares,ba bens servisu nian hamutuk $ 38,239mil,transferensia publika iha 2.500 mil, kapital menor $ 4.014 mil no kapital dezenvolvementu $4.367 mil.
“Husi kategoria salariu e vensimentu ho montante 47 miloens e 4 mil ne’e atu prosesa fo apoiu pagamentu salariu ba funsionamentu admistrativus iha nivel nasional no distrital husi Ministeriu da Edukasaun ne’ebe hamutuk 1.120(mil sentu e vinte) no mos privisaun ba vagas nebe sei iha atu priense tan 260 vagas inklui mos atu selu profesores hamutuk nain 12.777 pesoas”,dehan Ministro Freitas.