- Publika iha: 18 Fevereiro 2013
Hadia kondisaun infraestrutura bazika sai programa prioridade Ministeriu Edukasaun nian ho Orsamentu Jeral Estadu tinan 2013 ne’e.Tuir Ministru Edukasaun, Bendito Freitas katak infra-estrutura ba edukasaun agora dadaun sai hanesan difikuldade bo’ot tanba eskola barak mak nia kondisaun seidauk diak tan ne’e iha orsamentu jeral tinan ida ne’e buka atu responde ba buat sira ne’e.
“Iha tinan ida ne’e, eskola ne’ebé agora atu hadia tuir planu dezenvolvimentu integradu distritu nian iha 154 projeitu e orsamentu 12 miloens ital ne’ebé maka atu bele responde kona-ba infra-sturutura bazíka,” dehan Ministru Edukasaun, Bendito Freitas, (05/02), iha Parlamentu Nasional.
Kona ba preokupasaun sira seluk, nia dehan sei responde ho orsamentu jeral du estadu ba ano fiscal 2014 nian.
Entretantu Prezidente Komisaun F, Deputadu Virgilio da Costa Hornai hateten, kuaze eskolas hotu iha teritoriu tomak mak nia infra-estrutura bazika la diak.
“ Ami sei eziji hela ba parlamentu atu nune’e iha infra-strutura bázika ba edukasaun tenke hadia atu nune’e bele fo kondisaun diak ba eskola sira hodi nune’e estudantes sira bele hala’o prosesu aprendizanjen ho di’ak,” dehan Prezidente Komisaun F ne’ebe trata asuntu saude, edukasaun no igualidade jeneru iha Parlamentu Nasional ne’e.
Iha fatin seluk Reprezentante Eskola Nobel da Paz, Jeremias Pinto de Jesus hateten sira nia kondisaun eskola agora la favoravel liu atu estudante sira bele tuir prosesu aprendizajen ho diak.
“Ami iha estudante nain atus hitu resin e ami iha deit sala hat mak utiliza hodi hala’o prosesu aprendizajen, ami halo sala rotativa,” dehan Reprezentante Eskola Nobel da Paz ne’e.
Alem de ne’e, eskola ne’e mos laiha livrus liu-liu kona ba lingua Portugues nian, tanba tuir nia estudante la’os estuda deit iha klase laran maibe iha ne’ebe deit sir abele estuda.
Eskola Nobel da Paz rasik hahu nia atividade aprendizajen iha tinan 2002, ho total estudante ne’ebe barak atu hitu resin maibe sira nia kondisaun eskola kontinua at to’o agora.