- Publika iha: 12 Janeiro 2022
Ministerio Edukasaun Juventude no Desporto (MEJD) ho paresiro Care International no Embaixada Estadus Unidos America halao distribuisaun alimentasaun merenda eskolar inklui foos tonelada 160, koto, no ikan lata ba eskola hamutuk 40 hodi implementa merenda eskolar iha primeiro trimestre nian.
Diretor Geral Admistrasaun iha MEJD, Antoninho Pires, hateten eskola 40 ne’ebe mak governo ho nia parseiro distribui ona alimentasaun merenda eskolar ne’e iha Ainaro, Ermera, Liquica, no Manatuto.
Nia dehan, merenda eskolar ne’e hodi ofrese ai-han ho nutrisaun diak ba estudante sira konsumu iha eskola hodi partisipa iha prosesu aprendisagem hodi hetan rezultado ne’ebe mak diak.
“Husi eskola 40 ne’e total estudante hamutuk 89,000 mak sai benefisia ba alimentasaun merenda eskolar ne’e,” DG Admistrasaun iha MEJD Pires informa iha knar fatin Vila-Verde Dili.
Nia hateten, orsamento ba programa distribuisaun alimentasaun ho nutritivo ne’e husi governu America liu husi nia Embaixada iha Timor-Leste hodi implementa programa merenda eskolar iha eskola 40 refere.
Entretanto, Embaixador Estados Unidos America (EUA), Tom Daley, hateten governu America pronto apoio Timor-Leste iha area edukasaun, nutrisaun, no saude, hodi dezenvolve iha area edukasaun no saude.
“Programa apoio alimentasaun nutritivo ne’e ita ofrese orsamento ho montante 26 milhoens ba Ministerio Edukasaun Juventude no Desporto (MEJD) hodi bele implementa,” Embaixador EUA Daley hateten.
Nia dehan, EUA pronto nafatin tulun Timor-Leste hodi dezenvolve iha area edukasaun no saude nune’e ema hotu bele asesu ba eskola no saude ho diak.
“Labarik hotu iha Timor-Leste merese moris ho saudavel hodi partisipa iha prosesu aprendisagem hodi alkansa futuru ne’ebe mak brilhante,” nia salienta.
Alende ne’e nia dehan, EUA mos kuntiua apoio agrikultores sira hodi fornese ai-han ne’ebe nutritivo ba labarik iha Timor-Leste.