Ministeriu Ensinu Superior Siensia no Kultural (MESSK) uniformiza ona kurikulum nasional padraun minimu ba ensinu suprior privadu 16 iha Timor-Leste.

Ministeriu Ensinu Superior Siensia no Kultural (MESSK) uniformiza ona kurikulum nasional padraun minimu ba ensinu suprior privadu 16 iha Timor-Leste.

Ministru MESSK Longuinhos do Santos hateten, durante ne'e ensinu superior privadu sira ne'e programa kreditu no planu estudu lao tuir sira nia sistema rasik tanba governu seidauk iha kurikulun nasional ba universidade sira.

Maibe nia dehan, governu liu husi enkontru konsellu ministrus aprova ona kurikulun nasional padraun minimu ne'e hodi implementa iha esinu superior, nune'e programa kreditu no planu estudu nian bele lao tuir ona kurikulun nasional ne'e rasik.

"Ita uniformiza ona kurikulun nasional padraun minimu ne'e iha ensinu superior hodi permite dosente, estudante no peskizasor sira bele halo planu estudu iha nivel rejional no internasional," MESSK Santos hateten.

Nia dehan, uniformiza kurikulun nasional ne'e ho sistem kreditu ne'e hatuur ona iha artigo 19 no 20 husi lei baze edukasaun numeru 14/2008.

"Husi lei ne'e sei fo vantagem ba ita nia estudante ensinu superior sira atu sai emprendedor hodi kompete iha merkadu traballu ne'ebe real iha nasional no internasional," nia dehan.

Alende ne'e nia dehan, kurikulun nasional ne'e antes ne'e implementa ona iha Universidade Nasional Timor-Lorosa'e (UNTL) nian no hatudu katak implementasaun diak tebes no programa no planu estudu hotu ne'e realiza iha UNTL lao diak tebes.

"Ita hakarak uniformiza kurikulun nasional ne'e ba ensinu superior publiku 2 no privadu 16 iha Timor atu nune'e planu estudu tenke hanesan nune'e bele dezenvolve kualidade edukasaun iha Timor," nia salienta.

Entretantu Reitor Universidade da Paz (UNPAZ), Adolmando Amaral hateten, durante ezistensia UNPAZ hanesan instituisaun universidade privada ne'ebe mak legal iha Timor nian programa kreditu no planu estudu hotu lao tuir kurikulun universidade nian rasik tanba governu seidauk kria kurikulun ba ensinu superior.

"Atu dezenvolve kualidade iha universidade privadu liu-liu UNPAZ ita prontu lao tuir kurikulun nasional padraun minimu ba ensinu superior no ba oin planu eskola hotu ita sei lao tuir," nia hateten.

Tanba ne'e nia dehan, kurikulun hanesan matadalan no save ida hodi regula materia no prosesu planu de aula no programa kreditu hotu ne'ebe mak akumula iha universidade ida.