- Publika iha: 29 Janeiro 2013
Kareta bis rua ne’ebe uluk Ministeriu Edukasaun sosa ba UNTL, oras ne’e dadaun abandona hela iha armajen infraestrutura nian.“Iha sesta feira kotuk hau rasik ba, ami ba halo inspesaun ba iha partes infrastrutura ninian tama iha armajen ne’eba,ami hare katak auto carro rua ne’e kulafur hela tama ba laran iha ne’eba,” dehan Ministru Edukasaun, Bendito Freitas, (18/01), iha Dili.
Tuir nia, kareta hirak ne’e Ministeriu Edukasaun (ME) sosa iha governasaun Governu Aliansa Maioria Parlamentar (AMP) ba estudante Universidade Nasional Timor Lorosa’e (UNTL), maibe labele uza tanba diskunfia segunda maun (uzadu).Kazu ne’e rasik agora tama ona iha tribunal hodi hein prosesu tuir mai.
Ministru ne’e dehan, kuandu kareta segundu maun mak para hela deit nune’e, nia bele at liu tan tanba ne’e presiza buka medidas oinsa mak bele utilize kareta sira ne’e.
“Hau hanoin importante auto carro rua ne’e bele uza para fasilita ita nia estudante sira,liu-liu sira ba iha Hera ne’eba tanba do’ok,” dehan Ministru Freitas.
Entretantu Membru Parlamentu Nasional preokupa tebes ho prosesu kazu bis segunda maun ne’e tanba to’o agora seidauk iha rezultadu pozitive ba kazu ne’e.
“Ita la hatene kareta segunda maun ne’ebe sosa oras ne’e ninia prosesu la’o oinsa,” preokupa Deputadu Inacio Moreira.
Deputadu ne’e dehan, orsamentu ne’ebe aprova iha Parlamentu Nasional atu sosa ba kareta foun, la’os sosa fali kareta bekas.