- Publika iha: 24 Maio 2021
Prezidente da Republika de Timor-Leste Fransisco Guterres Lu-Olo hateten, sistema edukasaun ne’ebe iha seidauk garante estudante sira asesu ba programa eskola ba uma tanba estudante ho professores sira seidauk preparadu utiliza teknologia.
Nia dehan programa eskola ba uma ne’e politika ida ne’ebe governu liu husi Ministeriu Edukasaun Juventude no Desportu (MEJD) iha hodi fasilita estudante sira aprende husi uma via internet, televizaun, radiu durante implementasaun serka sanitaria.
“Maibe ita hare realidade hatudu katak sistema edukasaun nian seidauk garante estudante sira asesu ba programa eskola ba uma,” PR Lu-Olo hateten iha diskursu komemorasaun loron restaurasaun independensia de Timor-Leste, 20 maiu, ba dala 19 iha Palasiu do Prezidente.
Nia dehan, programa ne’e la garante tanba professor sira seidauk preparadu hodi utiliza teknologia ne’ebe disponivel hodi kuntinua hanorin iha situasaun Covid-19 nune’e mos estudante maioria la hatene asesu internet.
“Ita nia estudante balun mos la iha fasilidade sira ne’ebe mak prezija hodi partisipa iha programa eskola ba uma ne’e,” Prezidente Lu-Olo salienta.
Tanba ne’e nia dehan, governu tenke esforsu makas, tanba fulan hira ona etudante sira la ba eskola, governu tenke halo esforsu bo’ot ida hodi garante katak labarik sira bele kuntinua prosesu aprendisagem husi uma ho sistema ne’ebe mak diak.
Entretantu, Ministru MEJD, Armindo Maia, hateten programa eskola ba uma ne’e hanesan meios ne’ebe governu iha hodi fasilita estudante sira aprende iha uma durante implementasaun serka sanitaria.
“Esforsu ida ne’e mak durante ne’e governu halo maske ho falhansu barak, maibe tuir relatoriu ne’ebe iha hatudu katak estudante barak mak asesu ba programa eskola ba uma no tele eskola ne’e rasik,” Ministru MEJD Maia hateten.
Nia dehan, tuir relatoriu ne’ebe iha hatudu munisipiu hirak ne’ebe mak implementa programa eskola ba uma hanesan, Dili, Viqueque, Baucau, Ermera no Covalima, maioria estudante asesu no estudante sira ne’ebe la asesu ne’e tanba la iha telefone no balun iha uma televizaun no radiu la iha.
“Sira ne’ebe la asesu ne’e governu distribui deit material rezumu husi programa eskola ba uma nune’e sira bele estuda iha uma no halo trabalho ne’ebe iha livru laran,” hateten ministru.