UNTL Deside Ona Graduasaun Virtual Ba Finalista 100 Resin

Universidade Nasional Timor-Loro Sa’e (UNTL) deside ona graduasaun virtual ba finalista hamutuk nain 100 resin husi Fakuldade Medisina no Fakuldade Edukasaun Arte e Humanidade.

Vise Reitor UNTL Asuntu Estudantil no Garantia Qualidade, Samuel Venancio de Sousa Freitas hateten, husi parte universidade deside ona katak iha fulan Maio nia klaran ne’e UNTL sei realiza graduasaun virtual (online) ba finalista sira.

“Ami deside no prepara ona alternativu hodi hein desizaun husi governu nian nune’e bele halo graduasaun virtual ba ita nia finalist nain 100 resin ne’e,” Vise Reitor UNTL Sousa hateten.

Nia dehan, UNTL deside hodi realiza graduasaun virtual ne’e tanba liga ba rezolusaun governu konaba konfinamentu obrigatoriu iha Dili laran.

“Tuir lolos ita nia finalista sira ne’e gradua iha dia 13 de Maio tuir kalendariu akademiku, maibe tanba Covid governu aplika serka sanitaria no universidade deside graduasaun online ba finalista sira,” nia informa.

Entretantu, Ministru Ministerio Ensinu Superior Siensia no Kultura (MESSK), Longuinhos dos Santos hateten, graduasaun virstual ne’ebe mak UNTL atu realiza iha fulan Maio tenke aprezenta mekanismu ida diak ba governu.

“Graduasaun virtual ne’e foin mak akontese primeiru foin atu realiza iha UNTL tan ne’e hau husu atu prepara mekanismu ida ne’ebe diak no ferramenta ne’ebe atu uza ba graduasaun virtual ne’e rasik,” MESSK Santos husu.

Alende ne’e nia dehan, asuntu graduasaun virtual ne’e lalori polemika ba ministeriu naran katak preparasaun UNTL nia tenke adekuadu hodi bele garante graduasaun ne’e la’o diak.

Nia dehan, husi governu aseita graduasaun virtual ba finalista 100 resin iha UNTL ne’e realiza iha fulan Maio naran katak labele kontra regra ka protokolu ne’ebe rekomenda husi ministeriu saude.