Segunda, Maio 17, 2021

Tuir peskija ne’ebe mak Rede Edukasaun Timor-Leste Coalition for Education (TLCE) halo ba programa eskola ba uma hatudu katak estudante hahu husi esinu baziku to’o ensinu sekundariu 30% deit mak partisipa programa refere.

Kordenador TLCE, Jose Monteriu hateten, programa eskola ba uma ne’e la efetivu tanba la garante prosesu aprendisagem ba estudante sira liu-liu ensinu baziku no sekundario sira. 

Kordenador TLCE, Jose Monteriu hateten, programa eskola ba uma ne’e la efetivu tanba la garante prosesu aprendisagem ba estudante sira liu-liu ensinu baziku no sekundario sira.

“Tuir peskija ne’ebe mak ita halo rezultadu hatudu katak estudante 30% deit mak partisipa program eskola ba uma kompostu husi ensinu baziku to’o ensinu sekundariu sira no 70% la partisipa,” nia dehan.

Nia dehan, programa ne’e la ajuda estudante sira atu aprende mesak iha uma tanba durante ne’e estudante sira depende liu ba aula presensial no difisil ba sira atu estuda iha uma.

Maibe nia hateten, maske programa ne’e la ajuda estudante sira maibe ida ne’e mak mekanismu ne’ebe governu kria hodi apoio estudante sira aprende iha uma durante implementasaun estadu emergensia.

“Ami nafatin konsidera katak la ajuda estudante sira maibe dalan mak ida ne’e ona, laiha tan dalan seluk iha ambitu serka sanitaria,” nia salienta.

Tanba ne’e TLCE nafatin rekomenda ba Ministeriu Edukasaun Juventude no Desportu (MEJD) tenke reforsa liu tan programa refere hodi bele tulun estudante sira liu husi materia online no involve mos professor sira hodi halo aprezentasaun kada material.

Iha parte seluk, Ministru MEJD Armindo Maia hateten, ministeriu mos rekonhese katak programa eskola ba uma ne’e asessivel ba estudante sira hotu tanba ne’e mak governu lansa tan programa tele eskola ba ensinu sekundariu jeral no tekniku vokasional sira.

“Atu reforsa programa eskola ba uma ne’e ita lansa ona programa tele eskola ne’e ba ensinu sekundario jeral no vokasional deit nune’e sira bele partisipa iha aula televizaun durante implementasaun serka sanitaria,” Ministru MEJD Maia dehan.

Tanba ne’e nia informa tan katak programa eskola ba uma ne’e dadaun ne’e fokus liu ba estudante pre-eskolar deit no ensinu bazku no sekundario jeral no vokasional dadaun ne’e utiliza deit programa tele ba uma.

“Ita husu ba estudante sira atu aguenta akompanha lai prosesu aprendisagem husi programa sira ne’ebe ministeriu oferese hodi hein situasaun covid-19 iha Timor livre ona mak ita sei hahu aula presensial,” nia husu.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04