- Publika iha: 10 Abril 2021
Estudante Universidade Nasional Timor Lorosa’e (UNTL) hetan apoio internet grauita husi operador Telkomcel nune’e bele utiliza ba prosesu apredizajem via online durante implementasaun serka sanitaria iha kapital Dili laran.
Reitor UNTL Joao Soares Martins hateten, internet gratuita ne’ebe mak telkomcel apoio ne’e bazeia ba koperasaun diak entre instituisaun rua ne’e liu husi MoU ne’ebe asina ona iha tinan kotuk.
“Dadaun ne’e ita nia estudante Universidade Nasional Timor-Lorosa’e hamutuk 4.000 resin mak asesu ona ba internet gratuita ne’ebe mak operador telkomcel sira oferese,” nia hateten.
Nia dehan, prosesu ne’ebe estudante sira hetan hodi asesu ba internet gratuitu ne’e liu husi rejisto sim car telkomcel no identidade estudante nian iha instituisaun telkomcel nune’e bele hetan transferensia pakote gratuitu deit.
“Husi internet gratuita ne’ebe mak ita nia parseiru operador telkomcel oferese ne’e bele fasilita nafatin estudante sira hodi partisipa iha aula distansia durante iha serka sanitaria,” Reitor UNTL Martins hateten.
Alende ne’e nia dehan, UNTL sei halo abertura ba prosesu aprendisagem anu letivo 2021 nune’e ba oin estudante foun sira bele komesa ona aula distansia ka online husi uma.
Iha fatin hanesan estudante Angelica da Costa hateten, hanesan estudante agradese tebes tanba iha situasaun difisil hanesan ne’e sei iha ema ka individu no instutuisaun privado balun bele iha inisiativa diak hodi apoio estudante sira iha prosesu aprendisagem.
“Hau agradese tebes ba pakote gratuitu ne’ebe mak kompana telkomecel oferese mai ami estudante UNTL ne’e bele tulun duni ami hodi partisipa iha klas online,” nia dehan.
Alende ne’e nia dehan, hato’o mos agradese ba UNTL tanba ho nia esforsu ohin loron estudante sira bele asesu ona ba internet ho gratuitu.