- Publika iha: 13 Dezembro 2012
Tuir Grupu Mulher Parlamentar Timor-Leste (GMPTL) katak feto nia direitu atu asesu ba edukasaun nivel superior liu –liu asesu ba bolsu estudu sei minimu liu duke mane tanba interese individu domina liu no diskriminasaun sei maka’as tebes entre feto no mane maske iha Konstituisaun da Republika artigu 59 garantia katak edukasaun ba ema hotu. “Durante ne’e hau hare katak iha prosesu selesaun ba universitariu sira atu hetan bolsa de estudu sei iha KKN fo liu interese ba familia no amigus duke kapasidade intelektual ema ida nian atu kontinua estudu alende ne’e hau hanoin katak sei iha diskriminasaun iha Jeneru tanba presentazen ba feto ki’ik liu duke mane,” dehan Prezidente GMPTL, Deputada Josefa Alvares Soares, (04/12), iha Parlamentu Nasional.
Nia dehan, tuir lolos mentalidade ida ne’e labele akontese bazeia deit ba estudantes sira nia kapasidade intelektual, se feto mak iha kapasidade intelektual diak liu, mane tenke fo oportunidade ba feto tanba feto mos iha direitu atu asesu ba edukasaun iha nivel altu tanba Timor –Leste presiza rekursu umanu atu dezenvolve nasaun ida ne’e.
“Dalabarak ema dehan fo tiha oportunidade ba feto to’o dalan klaran sira kous, ne’e iha duni maibe presentazen ne’ebe ki’ik no iha ensinu superior la preve feto kous labele kontinua sira nia estudu tanba ne’e presiza hadia mentalidade ida ne’e,” tenik Prezidente GMPTL ne’e.
Iha parte seluk Odete Gaspar (joven feto ne’ebe la konsege kontinua estudu iha nivel superior) katak nia la kontinua nia estudu iha Ensino Superior tanba ekonomia familia la sufsiente atu supporta nia eskola iha Universidade Privado sira hanesan Universidade Dili no seluk tan bainhira la hetan oportunidade atu asesu ba Universidade Publiku hanesan Universidade Nasional Timor –Lorosa’e (UNTL) no difisil asesu ba informasaun oinsa asesu ba bolsa estudu.
“Ba hau iha vontade atu kontinua hau nia estudu iha nivel alto maibe ida ne’e mak hau nia situasaun real ne’ebe iha fo obstaklu ba hau atu kontinua estudu alende ne’e iha prosesu selesaun ba bolsu estudu ne’ebe Ministeriu Edukasaun sei iha interese individu no diskriminasaun sei maka’as iha prosesu laran,” dehan Joven Feto oan ne’e.