- Publika iha: 20 Fevereiro 2021
Ministerio Admistrasaun Estatal aloka osan 15 milhoes hodi reativa implementasaun programa merenda eskolar iha Timor-Leste ba primeiro trimestre nian, kada Munisipio montante sei aloka tuir numero estudante ne’ebe mak iha.
Ministro MAE, Miguel Pereira de Carvalho hateten, orsamento 15 milhoes ne’e husi Orsamentu Jeral Estado (OJE) nian rasik, hodi reativa fali implementasaun programa merenda eskolar iha iha teritorio laran tomak.
“Osan 15 milhoes ne’e ita aloka programa merenda eskolar duransaun fulan tolu nian, osa ne’e ita transfere ona ba konta bankaria kada munisipio hodi utiliza ba reativa merenda eskolar,” Ministero MAE Pereira informa.
Nia dehan, orsamento ne’ebe aloka ne’e tuir kalkulasaun ne’ebe mak ministerio estatal halo katak kada estudante hetan 25 sentavos kada loron no montante osan ne’e kada eskola hetan diferente tanba bazeia ba numero estudante.
“Orsamentu ne’e ita transfere ona ba konta bankaria iha munisipio no merenda eskolar komesa hahu ona kada eskola,” nia hateten.
Nai hateten, implementasaun programa merenda eskolar ne’e husi MAE mak apoio kona ba orsamentu no kona ba monitorizasaun husi Ministerio Edukasaun Juventude no Desporto (MEJD) mak tama konta.
Entretantu, Diretor Nasional Asaun Sosial Eskolar (DNASE), Joaquim Martins, hateten orsamentu ne’e MAE transfere ona ba munisipio no programa merenda eskola hahu reativa ona.
“Menu ne’e ita oferese iha kategori tolu ba implementasaun merenda eskolar no hanoin hamutuk husi ita nia NGO lokal sira mak hanesan, ai-han haburas, ai-han karbohidrato, no nutrisaun,” Diretor DNASE Martins dehan.
Nia hateten, hahu reativa ho menu kategoria tolu ne’e depois MEJD sei halo monitorizasaun hodi hare nia implementasaun la’o oinsa presija halo mudansa ka kuntinua hadia deit implementasaun.
“Total estudante ne’ebe mak iha lista atu asesu ba merenda eskolar hamutuk 320.539 kompostu husi pre-eskolar to’o ensinu baziku iha Timor laran,” nia salienta.
Tanba ne’e, nian agradese ba koperasaun serviso entre MEJD no MAE nia esforsu hodi reativa fali programa merenda ekolar iha eskola.