Sexta, Março 29, 2024
Total visitors: 766366

Vise Ministro Edukasaun Juventude no Desporto (MEJD), Antonio Guterres hateten, Organization Uniten Nations Educational Scientific and Cultural (UNESCO) apoio sentro aprendisagem ensino rekorente tolu (3) ba MEJD tanba iha koperasaun serviso hodi fasilita Timoroan sira asesu ka edukasaun ida ne’ebe mak digno.

Vise Ministro Edukasaun Juventude no Desporto (MEJD), Antonio Guterres hateten, Organization Uniten Nations Educational Scientific and Cultural (UNESCO) apoio sentro aprendisagem ensino rekorente tolu (3) ba MEJD.

Nia dehan, sentro aprendisagem ensino rekorente tolu ne’ebe mak UNESCO apoio ne’e iha munisipio Bobonaro, Baucau, no iha kapital Dili hodi bele tulun maluk sira ne’ebe mak para eskola kleur ona karik sira hakarak kuntinua fali bele asesu husi ensino rekorente.

“Sentro aprendisagem ensinu rekorente ne’e estabelece iha munsipio sira atu ita bele inklina ita nia joven sira ne’ebe mak hakarak kuntinua fali eskola iha ensinu baziku terseiro siklu no sekundario iha ensinu rekorente,” nia dehan.

Tanba ne’e nia dehan, implementasaun programa ensino rekorente ne’e hodi fo importansia ba maluk joven sira ne’ebe mak para tiha eskola iha tinan barak nian laran, sira hakarak kuntinua fali iha eskola publiku no privado sira moe, ensino rekorente pronto fasilita.

Entretanto, Xefe Departamento no Implementasaun Programa Ensino Rekorente, Gilberta Baiao hateten, sentro ensino rekorente ne’ebe antes ne’e iha hodi halo nia aktividade iha munisipio 6 iha Timor-Leste laran.

“Munisipio 6 ne’ebe mak ita nia aktividade lao mak hanesan Aileu, Ermera, Lautem, Manatuto, Manufahi no Rejiao Admistrativo Espesial Oe-Cusse Ambeno (RAEOA),” Xefe Departamento Baiao hateten.

Nia dehan, iha tinan 2020 Timoroan ne’ebe mak asesu ensino reskorente iha munisipio 6 ne’e hamutuk nain 1,053 estudante.

“Agradese tebes ba parseiro UNESCO tanba bele apoio kria tan sentro aprendisagem komunitario ensinu rekorente iha munisipio tolu ne’e hodi bele tulun Timoroan sira bele asesu ba edukasaun ne’ebe hanesan,” nia dehan.

Tanba ne’e nia dehan, espera husi sentro tolu ne’e bele tulun tan implementasaun programa esnsino rekorente iha Timor-Leste hodi fo oportunidade ba Timoroan hotu asesu ba nivel edukasaun sira ne’e.