Munisipio hat (4) ne’ebe besik liu fronteira entre Timor-Leste no Indonesia, inklui Bobanaro, Covalima, Oecusse no Liquica kontinua suspende prosesu aprendisagem iha eskola tanba risku ba transmisaun Covid-19 iha Timor-Leste.

Ministro Edukasaun Juventude no Desporto (MEJD), Armindo Maia hateten, eskola sira ne’ebe besik fronteira ne’e kondisaun hodi halo prevensaun Covid-19, maioria menus liu no situasaun hirak ne’e bainhira loke fasil tebes ba moras corona virus atu daet.

Ministro Edukasaun Juventude no Desporto (MEJD), Armindo Maia hateten, eskola sira ne’ebe besik fronteira ne’e kondisaun hodi halo prevensaun Covid-19, maioria menus liu no situasaun hirak ne’e bainhira loke fasil tebes ba moras corona virus atu daet.

“Eskola sira iha fronteira atu reativa presija hare didiak lai nia kondisaun maske balun 100%diak maibe ita labele obriga,” nia dehan.

Tanba ne’e nia dehan munisipio hat ne’ebe besik liu fronteira hanesan Bobanaro, Covalima, Oecuse no Liquica ne’e prosesu aprendisagem iha eskola kuntinu suspende tanba lakoi foti risku ba transmisaun surto corona virus ba rai laran.

“Ita nia estudante sira bele partisipa prosesu aprendisagem husi Televizaun no Radio no meios komunikasaun seluk tan ne’ebe mak fasilita programa Eskola Ba Uma,” Ministro MEJD Maia salienta.

Nia dehan, Ministerio foti desizaun ida ne’e tanba tuir rezultado monitorizasaun ne’ebe iha maioria eskola kondisaun ladun seguru no risku tebes atu kona moras Covid-19 maibe situasaun hirak ne’e sei aprezenta ba konselho ministros hodi foti desizaun.

Alende ne’e nia dehan, iha semana kotuk ne’e MEJD atribui ona maskara hamutuk 67,000 no ekipamento prevensaun seluk ba munisipio hat ne’e maibe seidauk sufsiente.

Entretanto, Diretor Edukasaun Munisipio Covalima, Edmundo Fereira hateten, eskola ne’ebe mak besik liu fronteira iha Posto Tilomar, Salele, Fatumea no Fatu-lulik iha eskola 9 komposto husi Ensino Baziku, Pre eskolar, no Tekniku Vokasional, maske kondisaun ne’e susar tebes maibe konaba ekipamento prevensaun sufsiente.

“Eskola 9 ne’e preparado ona hodi halo tuir protoloku husi Ministerio Saude nian maibe hein autorizasuan husi Ministerio Edukasaun Juventude no Desporto hodi bele hahu prosesu aprendisagem,” Diretor Fereira hateten.

Nia dehan, konaba kondisaun eskola no be’e sufsiente tanba hetan apoio husi inan aman, ekipamento prevensaun hanesan maskara no dezienfektan mos hetan apoio husi MEJD.

“Maibe desizaun hotu iha ministerio nian liman, karik autoriza loke ita loke karik labele entaun kuntinua suspende tanba ne’e diak ba Timoroan hotu nia saude tanba eskola 9 ne’e besik liu kedan iha fronteira no fasil atu hadaet,” nia informa.

Maibe nia dehan, karik reativa mos fiar katak sei la fo impakto ba transmisaun moras surto corona virus liu husi estudante sira iha fronteira ida ne’e sei la akontese.

Iha parte seluk Cordenador Rede Edukasuan Timor-Leste Coalition for Education (TLCE) Jose Monteiro hateten, diak liu eskola sira ne’ebe mak idetifikado besik liu fronteira no risku ba Covid-19 ne’e hapara lai prosesu aprendisagem no eskola sira seluk bele kuntinua maibe governo mos tenke buka meios oinsa atu estudante hotu bele aprende hanesan.

“Ita husu Ministerio Edukasaun Juventude no Desporto tempo normaliza programa eskola ba uma ne’ebe mais fasil atu estudante sira bele aprende ho diak, se lae bele inklina sira iha munisipio laran iha eskola ne’ebe mak la risku ba Covid,” TLCE Monteiro dehan.

Nia hateten, MEJD tenke kria meios ida ne’ebe mak tuir ema hotu nia hakarak nune’e labele mosu diskriminasaun ba estudante sira.