- Publika iha: 25 Janeiro 2021
Rede Edukasaun Timor-Leste Coalition for Education (TLCE) husu Ministerio Edukasaun Juventude no Desporto (MEJD) atu tau atensaun ba formasaun professor sira, liu-liu ba professor Ensino Baziku Central (EBC) sira atu nune’e sira bele iha konhesimento ne’ebe mak diak hodi eduka estudante sira.
Kordenador TLCE, Jose Monteiro hateten, formasaun professores ne’e tenke jeral iha area hotu hanesan plano jestaun eskolar, komputador, lingua, plano sala de aula no seluk tan atu nune’e bele hadia kualidade no dezenvolvimento iha area edukasaun barak liu husi professore sira.
“Ita haree kualifikasaun professor, Ensino Baziku seidauk prienxe kriteriu liu-liu utilizasaun komputador hodi bele halo dadus ruma no hanorin iha eskola nune’e mos abilidade hanorin ne’e sei menus liu,” Cordenador TLCE Monteiro hateten.
Nia dehan, ida ne’e parte ida ne’ebe mak la kontribui ba susesu kualidade ba dezenvolvimento edukasaun iha Timor-Leste.
“Ita hare rezultado formasaun ne’ebe mak Ministerio Edukasaun Juventude no Desporto (MEJD) halo iha tinan barak nia laran hatudo katak konaba lian portugues kuaze professores hotu hatene, maibe konaba transforma siensia seidauk diak, no balun iha konhesimento ba siensia diak maibe ba lingua ladiak inkliu mos utilizasaun komputador,” nia salienta.
Tanba ne’e, husu ba MEJD kada tinan tenke tau prioridade ba formasaun professores nune’e professor sira iha konhesimento diak bainhira transforma siensia ba estudante sira mos ho diak no tuir duni curikulun.
Entretantu, Diretor Jeral MEJD, Odelia Das Dores Martins, hateten formasaun profesor sira ne’ebe mak ministerio ofrese ne’e halo rotasaun, la’os ba professores sira hotu dala ida.
“Ita halo uluk ba etapa primeiro depois ita sei halo avaliasaun professor sira ne’e iha ona konhesimento diak ka lae, karik diak ona nia tenke prepara ba formasaun espesifiku sira,” DJ MEJD Dores informa.
Maibe nia dehan, ba professor sira ne’ebe mak seidauk iha konhesimento diak sira nafatin tuir formasaun iha etapa jeral nian.
“Maibe iha tinan 2020 ne’e formasaun professores ne’e parado tanba liga surto corona virus nune’e mos orsamento,” nia dehan.
Alende ne’e nia dehan, kada tinan Ministerio sempre fo prioridade ba formasaun professore no rotasaun ba professores tenke husi eskola mak aprezenta dados.
“Kada tinan ministeriu sempre halo formasaun maibe minimo liu no la kobre professores hotu tanba depende ba kapasidade ne’ebe mak ministerio iha,” nia salienta.
Alende ne’e nia dehan formasaun konaba utilizasaun komputador, ministerio so ofrese deit ba kargo xefia, kordenador eskolar sira ne’ebe mak halo plano eskolar.