- Publika iha: 15 Dezembro 2020
Fornesedor Merenda Eskolar husi eskola lima tuir formasaun espesifiku husi World Food Programme (WFP) konaba oinsa atu prepara ai-han ne’ebe mak seguru ba estudante sira iha eskola.
Xefe Programa WFP, Anastacio Suriano hateten, formasaun ne’e importante oinsa atu hasa’e konhesimento diak prepara ai-han ne’e seguru oinsa no nia kualidade oinsa ba estudante sira atu konsumu.
“Formasaun ne’e ita fo atu nune’e fornesedor sira atu bele iha kapasidade diak hodi prepara ai-han ne’e mak seguru, nutriente, higiene atu nune’e ita nia estudante sira konsumu atu labele hetan moras,” nia informa.
Tanba ne’e WFP serviso hamutuk ho Ministerio Edukasaun Juvetude no Desporto (MEJD) nune’e mos Ministerio Saude (MS) hodi prepara manual ida oinsa atu prepara ai-han ne’ebe mak seguru.
“Tanba ne’e dadaun ne’e ami hahu fo ona treinamento ba eskola lima mak hanesan, EBC 3 Metinaro, Darelau, Manleuana, Ensinu Baziku Central (EBC) Lelau, no Ensinu Baziku Filial (EBF) Lelau no EBF Lebutun,” Xefe Programa WFP Suriano hateten.
Maibe nia dehan, treinamento ne’e sei kuntinua ba fornesedor sira iha eskola hotu atu nune’e sira bele hatene didiak prepara hahan ne’ebe seguru ba estudante sira.
Entretanto, Diretor Nasional Asaun Social Eskolar (DNASE) Joaquin Martins hateten, formasaun refere importante tebes ba fornesedor sira oinsa atu hadia implementasaun merenda eskolar liu-liu konaba prepara ai-han seguru.
“Eskola lima ne’ebe mak hetan oportunidade ba formasaun ne’e eskoilido husi WFP oinsa, atu bele tein ho diak no oinsa atu prepara relatorio, higene pesoal ba fornesedor sira,” nia saliente.
Tanba ne’e nia dehan, atu prepara ai-han ne’ebe mak no nutrisaun diak, fornesedor sira mos tenke uza avental no material higiene seluk ne’ebe mak importante tebes no tenke iha saude diak.
“Atu nune’e hahan ne’ebe mak ofrese ba ita nia alunus sira ho nutritivu, seguru no higiene hodi bele afeta diak ba saude estudante nian,” Diretor DNASE Martins hateten.
Alende ne’e nia informa katak antes ne’e mos governo halo ona treinamento ba fornesedor sira maibe la maximu liu-liu konaba prepara ai-han ne’ebe mak seguru, tanba ne’e husu nafatin ba parseiro WFP atu bele kuntinua fo formasaun ba fornesedor sira hotu.
Iha parte seluk Diretora Ensinu Baziku Central (EBC) Manleuana, Rosa Alta Marcal da Cruz hateten, fornesedor ne’ebe mak durante ne’e prepara ai-han ba estudante iha eskola refere la permanente no kada fulan sira sempre troka ema.
“Ami nia fornesedor kada fulan ami sempre troka, tanba ami iha aldeia 11, tanba ne’e tenke halo rotasaun no la iha permanente,” nia informa.
Maibe konaba konhesimnto prepara ai-han ne’ebe mak seguru, higiene no oinsa prepara ai-han ne’ebe mak nutrisaun diak sira iha konheseimento diak tanba sira tuir formasaun ona.