- Publika iha: 11 Novembro 2020
Dezenvolvimento kualidade ensinu superior iha Timor-Leste sai asuntu importante ba governo liu husi Ministerio Ensino Superior Siensia no Kultura (MESSK) atu hadia em termo de infrastrutura, bibloteka, rekursu humanus, kurikulu, no mos fasilidade seluk ne’ebe mak presija hodi garante kualidade ensinu superior nian.
Ministro MESSK, Longuinhos do Santos hateten, atu atinje kualidade iha ensino superior kestaun hira ne’e mak importante atu bele kompleta no hadia iha ensinu superior sira hotu ne’ebe mak eziste.
“Infrastrutura, bibloteka, rekursus humanu, kurikulun ne’e sai ona prioridade iha plano dezenvolvimento nasional no sita mos iha Lema MESSK nia katak kualidade esdukasaun, kualidade formasaun sai futuru ba nasaun,” Ministro MESSK Santos hateten.
Tanba ne’e atu garante kualidade ba ensinu superior hotu tenke hadia infrastutura, rekursus humanus, bibloteka, no fasilidade seluk tan ne’ebe mak presija.
“Atu hadia kestaun hirak ne’e liu-liu ba ensinu superior privado sira ministerio ita kria ona kredito ne’ebe mak ne’ebe mak ho taxa juru ne’ebe mak ki’ik hodi fo apoio ba sira atu bele hadia sira nia kualidade,” nia hateten.
Nia informa tan katak, esforsu sira ne’e governo halo liu-liu ba ensinu superior privado sira atu hadia infrastutura, rekursus humanu, bibloteka, tanba sira dependesia ba propinas husi estudante sira no ba ensinu superior publiku ne’e 100% husi governo.
Entretanto, Reitor Universidade Dili (UNDIL), Jose Belo hateten, dezenvolvimento kualidade iha ensinu superior privado sira durante ne’e, esforsu rasik husi instituisaun, liu-liu formasaun ba dosente, infrastrutura, no buat seluk tan ne’ebe mak nesesidade.
“Ita nia governo durante ne’e apoio mak motivasaun deit, maibe apoio orsamento ne’e la iha, hadia kualidade hotu ne’e husi ami rasik,” Reitor UNDIL Belo hateten iha Vila-Verde, Dili.
Maibe dadaun ne’e husi parte ensinu superior privado orgulhu tebes ho politika governo nia hodi loke kredito ne’ebe mak to taxa juru ba instituisaun privado sira atu bele hadia infrastrutura, eskola, rekursus, humanus, laboratorio, bibloteka hodi bele garante kualidade iha eskola refere.
“Hau hanoin ho politika ne’ebe mak governo aplika ne’e bele dezenvolve kualidade iha ensinu superior privado sira ne’ebe mak oras ne’e dadaun funsiona hela,” nia espera.
Tanba ne’e nia dehan, maske dezenvolve neineik maibe bei-beik, loron ida bele atinje kualidade lolos iha ensinu superior iha Timor-Leste.