- Publika iha: 30 Novembro 2012
Hafoin halo observasaun no monitorizasaun ba eskola Ensino Baziku (EB) Beduku, Timor-Leste Coalition for Edcation (TLCE) deskobre katak eskola ne’e laiha sintina no situasaun ida ne’e difikulta estudante sira bainhira atu sintina.“Horseik ami ba hakbesik depois ba hare ne’e saneamentu hanesan sintina ne’e laiha,” hateten Program Manager TLCE, Matias dos Santos, iha Kaikoli,Dili.
Durante ne’e Estudante sira bainhira presiza atu ba soe bee ka sintina, sira tenke halai ba iha ai laran tanba eskola laiha sintina e bee ba iha eskola ne’e mos la iha se enkuantu presiza bee tenke la’o ho distansia 100 .
“Problema ida hanesan ne’e afeta ba eskola barak los tanba eskola ida iha Kai-coli ne’e mos maran,”dehan Program Manager TLC ne’e.
Hatan asuntu ne’e Xefe Departementu Ensino Baziku, Aquelino Gusmao Soares katak, aguapotavel ba eskola hotu-hotu ne’e problema Ministeriu da Edukasaun ninian.
“Ne’e problema nasional,e Ministeriu Edukasaun sei servisu hamutuk ho ministeriu sira relevante atu oinsa bele kanaliza bee ba iha eskola sira ne’ebe seidauk iha bee,” dehan Xefe Departementu ne’e.
Tuir nia, problema hanesan ne’e la’os akontese deit iha eskola ida maibe eskola barak maibe ministeriu tenta nafatin atu hare ba problema sira ne’e.