- Publika iha: 16 Outubro 2020
Rede Edukasaun Timor-Leste Coalition for Education (TLCE) konsidera Ministerio Edukasaun Juventude no Desporto (MEJD) la konkorda ho ministerio nia desizaun konaba produsaun materia ezame nasional ne’ebe mak kontrata fali kompanhia privado hodi halo produsaun, tanba ida ne’e sei la garante katak seguro.
Kordenador TLCE, Jose Monteiro hateten, materia ezame nasional ne’e materia ne’ebe mak sensitivo no la autoriza kontrata fali kompanhia privado tanba bele hamosu erro iha prosesu produsaun.
“MEJD kontrata kompanhia privado ba produsaun materia ezame nasional ne’e, ita konsidera katak ministerio kuntribui hodi estraga rekursu estado nian tanba kompanhia mak halo produsaun ne’e la garante seguro,” nia hateten.
Tanba ne’e ministerio tenke hadia politika hodi responsabiliza ba desizaun sala ne’e, tanba MEJD husu tiha atu kria Sentro Imprimi iha Comoro ho suporta husi Governu Korea, no ikus mai abandona fasilidade refere ne’e deit.
“Ho desizaun sira ne’e, TLCE konsidera MEJD mal jesatun hodi jere materia sensitivo estado nian ne’ebe mak responsablidade intrega iha sira hodi garante seguransa atu bele seguru nune’e labele bocor,” Kordenador TLCE Monteiro dehan.
Tanba ne’e, karik mosu erro ruma iha prosesu produsaun ne’e MEJD tenke responsabilidade ba estado.
Entretanto, Ministro Edukasaun Juventude no Desporto, Armindo Maia hateten, iha kontrato ne’ebe mak ministerio halo ho kompanhia privado iha regulamento balun ne’ebe mak kesi metin oinsa atu garante materia hirak ne’e.
“Ita husu mos ba kompanhia atu serviso ho responsabilidade hodi garante no asegura konfidensia ba materia ezame nasional no labele espalha iha publiku,” Ministro Maia dehan.
Enkuanto nia dehan, projeto ne’e la’os foti diretamente maibe loke konkurso publiku no ikus mai kompanhia ida mak sai vensedor.
“Husu ba ita bo’ot sira atu nafatin, asegura seguransa ida ne’ebe mak diak, tanba imi nia serviso hodi determina labarik sira nia futuru,” nia hateten.
Alende ne’e nia dehan, iha prosesu produsaun ne’e miniterio sei kopera mos ho parte polisia nune’e bele halo seguransa. Nia haktuir total orsamento ne’ebe mak uza ba produsaun materia ezame nasional ne’e total rihun $385.109.
Iha parte seluk, jestor kompanhia ne’ebe manan kontratu husi MEJD, ho inisial MA, promete husi parte kompanhia sei serviso ho responsabilidade ho asegura masimo iha prosesu produsaun materia ezame nasional ne’ebe mak ministerio edukasaun juventude no desporto fo konfiansa ba sira nia kompanhia atu imprimi.
“Ita tenke kria tan regra foun ida ne’ebe rigorozu hodi kontrola ami nia trabalhador sira ne’ebe mak atu asesu tanto husi ministerio edukasaun,” nia informa.
Tanba ne’e nia dehan, ho regras ne’ebe mak sira kria ona garante katak iha prosesu produsaun ne’e sei la mosu falhansu ruma.