- Publika iha: 16 Outubro 2020
Eskola sekundario 29 komposto husi sekundario jeral no tekniku vokasional iha kapital Dili kopera ho polisia PNTL kontrola hodi movimento estudante sira hatais farda iha jardim, durante oras eskola nian.
Komandante Polisia Munisipio Dili, Superientendente Xefe Henrique da Costa hateten, koperasaun ne’e mak polisia ho parte eskola halo ne’e tanba, estudante sekundario sira iha Dili laran barak mak abandona eskola, depois pasir iha jardim ho farda eskola nian.
“Jardim ne’ebe mak ita identfika bain-bain estudante sira halo movimento ho farda iha oras eskola nian, mak Largo Lecidere, Motael, 5 de Maio, JP, no Cristo Rei,” Komandante Polisia Costa hateten.
Nia dehan, estudante sira ne’e, sai husi uma dehan ba eskola maibe to’o dalan klaran, ba fali fatin seluk.
“Tanba ne’e eskola kopera ho parte polisia hodi kontrola estudante sira ne’ebe movimento uza farda iha jardim ka uza hodi hemu tua. Ne’e ita sei kaptura,” nia dehan.
Tanba ne’e nia dehan, depois de polisia kaptura sei intrega ba parte eskola hodi foti desizaun rasik.
“Koperasaun ne’e kontrola mos estudante sira ne’ebe mak sempre involve iha konflito hanesan eskola Kristal nune’e mos Nobel ba Paz, no eskola seluk tan,” nia informa.
Entretanto, Diretor Eskola Sekundario Sao Jose Operario, Domingos Godinho hateten, eskola sekundario sira iha Dili laran ne’e, kada eskola alunus barak, relasaun serviso hamutuk husi parte eskola no polisia ne’e
importante tebes hodi kontrola estudante no forma sira hodi prepara ba futuru ne’ebe mak diak.
“Ita nia estudante sira ne’e mai ho karakter la hanesan, balun nakar ten, inan aman koalia la rona, depois mai eskola professor koalia sira la rona, uza farda hodi pasiar iha oras eskola, hemu tua, namora iha jardim, hodi hafoer eskola nian naran,” Diretor Eskola S.Jose Operario hateten.
Tanbe ne’e koperasaun ho PNTL momento ne’ebe mak diak hodi kontrola estudante sira, karik hetan polisia kaptura ho lori ba intrega iha eskola.