Quarta, Outubro 28, 2020
Total visitors: 530672

Ministerio Edukasaun Juventude no Desporto (MEJD) durante fulan ualu (8) hahu husi fulan marso to’o outubro 2020 ne’e, abandona Sentro Inprensaun Comoro tanba la iha rekursu humanu hodi garante nia funsionamentu.

Ministerio Edukasaun Juventude no Desporto (MEJD) durante fulan ualu (8) abandona Sentro Inprensaun Comoro tanba la iha rekursu humanu hodi garante nia funsionamentu.

Diretor Nasional Aprovizionamento, MEJD, Pascoal Couto hateten sentro inprensaun durante ne’e ministerio utiliza tanba pesoal tekniku hodi halo operasaun ba makina sira iha sentru husi Korea, maibe tanba situasaun pandemia global COVID-19, pesoal husi Korea refere seidauk bele fila ba Timor-Leste.

“Ho nune’e mak durante fulan 8 nian laran ita abandona sentro inprensaun, hodi la funsiona tanba ita la iha rekursu konaba tekniku operasaun makina nian,” DNA Couto hateten.

Nia dehan, makina ne’ebe mak iha sentro inprensaun ne’e governo Korea mak oferese ba governo Timor-Leste no MEJD, nune’e mos fasilita ho tekniku operasaun husi Korea rasik.

“Tanba ho pademia COVID-19, tekniku Koreano sira fila hotu ba Korea no agora daudaun ita nia sentro ne’e labele funsiona,” nia hateten.

Enkuanto nia dehan, pesoal Timoroan balun ne’ebe serviso iha sentro refere hetan ona formasaun, maibe baziku liu, konaba espesifiku hodi halo operasaun makina sira seidauk iha koñesimento.

Entretanto, membru Parlamento Nasional Deputado Antonio da Conceição hateten, kada tinan alokasaun orsamento ba ministerio edukasaun ho montante bo’ot tuir plano prioridade ne’ebe iha liu-liu konaba formasaun.
Deputado kestiona tanba sa mak labele fo formasaun espesialidade ba trabalhador Timoroan ne’ebe mak serviso iha area refere atu nune’e labele akontese situasaun sira hanesan ne’e.

“Governo tenke rezolve problema ne’e ho serio, atu nune’e labele akontese tan iha futuru hodi abandona sentro ne’ebe mak estado investe ona osan barak,” Deputado Conceição dehan.

Nia haktuir, atu rezolve problema sira ne’e governo tenke, halo formasaun espesifiku konaba tekniku operasaun makina ba trabalhador Timoroan ne’ebe mak serviso iha sentro refere nune’e bele funsiona iha situasaun saida deit, no labele depende ba tekniku huis estrangeiro.

Iha parte seluk Kordenador Rede Edukasaun Timor-Leste Coalition for Education (TLCE) hateten, TLCE lamenta tebes ho desizaun ne’e tanba, estado investe ona osan barak ba ekipamento, rekursu humanu, haruka funsionario sira ba tuir formasaun iha Korea hodi utiliza sentro ne’e rasik.

“TLCE husu MEJD atu responsabiliza rekursu estado ne’ebe mak abandona, ami konsidera ne’e mal jesatun husi governo rasik,” Cordenador TLCE Monteiro hateten.

Tanba ne’e nia dehan, situasaun sira ne’e hatudo katak ministerio edukasaun juventude no desporto la iha kapasidade hodi rezolve problema ne’ebe mak ministerio infrenta.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04