MESK Prepara Ona Kurikulun Minimu ba Ensino Superior Sira

Ministerio Ensino Superior Siensia no Kultura (MESK) prepara ona kurikulun minimo ba instituisaun ensino superior sira tanto publiku no privado hodi implementa, nune’e prosesu aprendisagem la’o tuir kurikulun ne’ebe mak governo oferese iha futuru.

Diretor Jeral Admistrasaun no Finansas, MESK, Hernani Viterbo da Costa Soares hateten, durante ne’e ensino superior sira iha Timor-Leste iha prosesu aprendisagem, la’o tuir kurikulun ne’ebe mak sira prepara rasik, tanba governo seidauk kria kurikulun atu bele implementa.

“Maibe dadaun ne’e ita prepara ona kurikulun minimo hodi bele implementa no fasilita ensino superior sira, ba futuru prosesu aprendisagem tenke la’o tuir kurikulun ne’e rasik,” nia hateten.

Nia dehan, kurikulun ne’ebe mak preparado ona ne’e halo husi ministerio ensino superior siensia no kultura (MESK) no mos peritos internasional no nasional sira hodi finaliza.

“Kurikulun ne’ebe mak ita prepara ne’e, MESK husu mos opiniaun husi husi ensino superior sira, atu nune’e labele mosu problema iha implementasaun,” DG AF MESK Veterbo.

Nia dehan, antes atu implementa kurikulu governo sei halo uluk sosializasaun ba ensino superior sira atu intende didiak hodi implementa iha sira nia instituisaun.

Entretanto, Reitor Instituto of Buicenis (IOB) Agusto Martins hateten, prosesu aprendisagem ne’ebe mak durante ne’e IOB implementa tuir modul ne’ebe mak sira prepara.

“Maibe iha 2018 ne’e governo liu husi Ministerio Edukasaun konvida instituisaun superior sira hotu hodi tau hamutuk opiniao nune’e bele kria kurikulun padrao minimo ba ensino superior hotu,” Reitor IOB Martins hateten.

Nia dehan, karik kurikulu ne’e finaliza ona governo tenke konvida fali ensino superior sira hotu hodi hare prosesu finaliza ne’e oinsa, no implementasaun ne’e la’o oinsa serake tuir duni nesesidade.

“Kurikulun ne’ebe mak prepara ona ne’e diak, atu nune’e bele hadia kualidade iha ensino superior maibe iha husu mos governo tenke involve konselho reitores sira hotu iha prosesu halo kurikulun,” nia dehan.

Maibe nia dehan, espera katak ho kurikulun ne’e mak governo prepara ne’e, iha prosesu implementasaun labele mosu ero ruma no tenke tuir nesesidade universidade nian.