Tuir peskija Rede Edukasaun Timor-Leste Coalition for Education (TLCE) konaba infrastrutura eskola hatudo katak eskola 1,500 iha teritorio laran seidauk kompleta saneamento baziku hanesan be’e moos nune’e mos sintina hodi fasilita estudante sira iha eskola.

Kordenador TLCE, Jose Monteiro hateten total numero ne’e komposto husi eskola Pre-Eskolar to’o Sekundario Jeral, no ida ne’e hatudo katak dezenvolvimento edukasaun seidauk atinje nian padraun lolos.

Kordenador TLCE, Jose Monteiro hateten total numero ne’e komposto husi eskola Pre-Eskolar to’o Sekundario Jeral, no ida ne’e hatudo katak dezenvolvimento edukasaun seidauk atinje nian padraun lolos.

“Kada tinan preve orsamento jeral do estado ba area edukasaun ne’e bo’ot, tanba sa mak sei iha nafatin eskola 1,500 mak la kompleta ho saneamento baziku,” nia kestiona.

Nia dehan, iha peskija ne’ebe mak sira halo, eskola 1,500 durante ne’e estudante sira utiliza deit fasilidade sira husi komunidade ne’ebe mak hela besik eskola sira nia haris fatin nune’e mos ba ai laran no situasaun ida ne’e la diak no perigozo, liu-liu ba estudante feto sira.

“Ita husu ba ministerio edukasaun tenke toma responsabilidade ba problema saneamento baziku iha eskola. Ita nia peskija rekomenda bei-beik ona atu bele tau iha prioridade,” nia dehan.

Nia dehan, saneamento baziku ne’e nesesidade tebes iha eskola, hodi fasilita estudante sira. La’os sente atu soe be’e bo’ot ki’ik, estudante tenke fila ba uma ka halai ba ailaran, no katak TLCE la konkorda ho realidade ida ne’e.

Entretanto, Ministro Edukasaun Juventude no Desporto (MEJD), Armindo Maia hateten dados ne’ebe mak husi sosiedade sivil sira hato’o ne’e governo simu ona hodi tau iha plano orsamento jeral do estado 2021 nian.

“Iha plano orsamento 2021 ne’e ita sei rehabilita uluk eskola 680, no kompleta saneamento baziku,” MEJD Maia dehan.

Nia dehan, prosesu rehablitasaun eskola hodi kompleta saneameto baziku sira ne’e governo labele finaliza dala ida maibe faze por faze husi plano VIII governo nian.
“Iha 2021 ne’e ita preve montante 35 milhoes hodi halo rehablitasaun ba infrastrutura eskola inklui saneamento baziku,” nia dehan.

Nia dehan, governo sei serviso makas no halo koperasaun ho parseiro nasional no internasional sira hodi realiza programa prioridade VIII governo nian liu-liu kompleta infrastrutura eskola iha Timor-Leste laran.