- Publika iha: 02 Setembro 2011
Porta voz Sindikatu Profesores Timor-leste (SPTL), Agostino Soares hateten durante Konsellu Ministru (KM) seidauk fo sai rezultadu kona-ba implementasaun rejime de careera, maka profesores sira se la kontinua formasaun to’o hetan solusaun.
“Kazu ne’e aprezenta ona ba iha Konsellu Ministru e Vise Ministru haruka ona mensajen ba ami katak iha ona rezultadu positivu maibé ne’e hanesan informal verbal de’it,” hateten Agostinho Soares , semana kotuk iha eskola Sekundaria 4 de Setembru Unamet Balide, Dili.
Tuir nia, sira sei fila fali ba tuir fromasaun bainhira Ministériu Edukasaun fo sai ona rezultadu husi Konsellu Ministru.
“Ami deside ona katak ami sei haruka profesores sira iha 13 distritu,ida-ida sei fila ba sira nia Sentru Formasaun hodi kontinua fali sira nia kursu, maibé karik nafatin laiha rezultadu ami sei abandona formasaun,” nia dehan.
Total profesores ne’ebé abandona sira nia formasaun ne’ebé oras ne’e halibur hamutuk iha eskola Sekundariu 4 de Setembru Unamet Balide hamutuk 500 resin inklui profesores voluntariu sira husi distritu hotu.
Entertantu tuir Professor ida ne’ebé lakohi publika nia identidade, katak bainihra rezultadu seidauk fo sai husi Konsellu Ministru, maka sira sei latuir formasaun.
“Tanba ami deside hamutuk ona katak se ME seidauk publika sai rezultadu husi konselho Ministro nia desizaun ami seidauk bele tuir formasaun ne’e,” dehan fonts konfirmadu ne’e.