- Publika iha: 02 Setembro 2011
Relasiona ho proklamasaun loron independensia Republika Indonezia (HUT RI) ne’ebé sei hala’o iha 17 Agustu kada tinan inklui iha Timor-leste, alunus husi Eskola Primaria Farol sei kanta muzika inu nasionál Indonezia nian iha komemorasaun ne’e.
Tuir professor EP. Farol, Januario Belo, katak sira hetan autorizasaun husi embaixada Indonezia atu kanta muzika Inu Nasionál Indonezia nian no muzika Patria-Patria.
“Tinan rua ona parte embaixada Indonezia servisu hamutuk ho ami e ami sei kanta Inu Nasionál Timor nian Patria-Patria nomós kanta muzika proklamasaun independensia Indonezia nian 17 Agustus,”hateten Januario Belo, semana kotuk iha Embaixada Indonezia,Farol,Dili.
Tuir nia, antes tama ba loron ne’e, alunus sira tuir uluk treinamentu iha embaixada e treinamentu ne’e tama bad ala sia nian depois de Timor ukun aan.
“Treinamentu ne’e remata iha loron 9 fulan ne’e, e treinador rasik ema Indonezia husi Bandung,”nia informa.
Entretantu tuir Deputadu Domingos da Costa, katak loron 17 Agustus hanesan loron determinasaun ba nasaun Indonezia atu hetan ukun rasik aan e presiza duni komemora.
“Maske ita Timor la’os halo festa ruma atu hasoru loron ne’e maibé komemorasaun ba sira nia loron, ita sempre hanoin, halo refleksaun konaba nasaun ida-idak nia ukun aan,” nia dehan.
Tuir nia, Indonezia hanesan nasaun uniku ne’ebé besik liu ho Timor-leste tanba baliza ho rai maran tanba ne’e presiza hametin relasaun diak ho sira.
Enkuantu tuir sidadaun Indonezia ne’ebé hela iha Kampo Alor, Andi Basi katak maske hanesan sidadaun Indonezia maibé nia parte nunka partisipa iha sira nia komemorasaun loron importante tanba okupadu ho negósiu.
“iha loron 17 Augustu ne’e ha’u tuir mak olahraga de’it mak hanesan halimar bulu tangkis, no hemu de’it no hein ami nia sasan,” Andy dehan.
Tuir Andi, durante tinan rua tu-tuir malu, komemorasaun loron 17 Agustus sempre monu iha tempu jejun (waktu puasa) nia laran.
Entretantu bainhira jornalista koko konfirma asuntu ne’e ba iha Embaixador Indonezia, maibé lakonsege tanba la hetan autorizasaun husi parte embaixada.