- Publika iha: 24 Julho 2012
Inisiativa diak husi Ministeriu Edukasaun (ME) aumenta material tolu hodi hanorin iha eskola Ensino Sekundariu sira, maibe professor sira ne’ebe atu hanorin material ne’e laiha.
“Materia kurikulum tuan nian hamutuk materia 15 deit, mais agora aumenta ho kurikulum foun tolu ne’e hamutuk 18 materia, problema mak professor ne’ebe atu hanorin material ne’e laiha,” hateten Sekretariu Jeral Sindikato Profesores (SPTL), Francisco da Costa Fernandes, iha Farol, Dili.
Tuir nia, material hirak ne’e agora implementa ona iha eskola sira e nia livrus ministeriu distribui ona mais profesor sira ne’ebe mak atu hanorin materia ne’e mak la iha.
“Maneira husi eskola koloka fali husi profesor sira ne’ebe mak hanorin Geografika tenki hanorin ho Geologia fali,” nia tenik.
Entretantu hatan ba preokupasaun ne’e Diretor Jeral ME, Apolinario Magno katak, Ministeriu halo ona rekrutamentu ba ema hamutuk 15 hodi ba eskola iha Brazil, foti area Kultura ninian, Artes, Muzika, Biblioteka, Museu no seluk tan.
“Neste momentu iha profesor balun hanorin musika ao mesmo tempu hanorin kultura,” dehan DJ Magno.
Iha sorin seluk Kordenador Nasional Timor-Leste Coalition of Education (TLCE), David Bendito afirma, lolos antes Governu atu implementa materia foun tolu ne’e tenki hare mos rekursu humanus.
“Agora ita foti deit materia hatama mais ita la prepara rekursu depois ita lori estudante sira ba iha ne’ebe,” Kordenador TLCE ,Bendito informa.
Nia hateten, kultura Timor komesa iha presaun nia laran tanba situasaun global obriga ema hotu-hotu hatais mini.
“Kultura ne’e importante,hakarak ka la kohi ita tenki halo tuir ita nia kultura tanbaKultura ita nia beiala sira mak husik hela mai ita,” Nia tenik.