- Publika iha: 27 Agosto 2011
Eskola publiku balun hala’o izame ba segundu periode la tuir kalendariu husi Ministeriu Edukasaun nian (ME) hanesan akontese iha eskola sekundaria 5 de Maiu no 12 Novembru, tanba falta de salas.
“Bazea ba orariu ne’ebe mai husi edukasaun, lolos ami hala’o izame iha 25 Jullu maibe ba primeiru no segundu ano ami hahu uluk iha 18 Jullu, nune’e bele koloka fatin ba estudante terseiru ano atu tuir izame e sira tenke tur ida-ida, e alende salas ami mos iha limitasaun profesores,” hateten Sancho
Pedro da Silva, Profesor iha Ensino Sekundaria 5 de Maiu,semana kotuk iha Dili.
Kona-ba subsidio ka osan ba izame nian, nia parte prepara tiha e sira uza uluk, hafoin osan husi ME mai hodi troka fali.
“ Orsamentu ba izame ne’e husi edukasaun duni maibe sidauk mai maibe ami prepara ona material sira depois mak hein orsamentu husi ministeriu no ami fiar katak osan ne’e sei mai, ” nia esperansa.
Entretantu tuir Diretor Nasional Curikulum n Avaliasaun Escolar, Raimundo Jose Neto hateten, bazea ba kurikulum no kalendariu edukasaun nian izame ba segundu periode, eskola publiku hotu-hotu hahu iha 25 Jullu.
“Orariu izame ami entrega ba eskola ida-idak e sira mak organiza, liu-liu atu halo orariu materia izame nian maibe sira so kumpri deit lron atu hahu izame tanba tau tiha ona iha kalendariu edukasaun nian,tantu Ensino Baziku, Ensino Sekundariu no Teknika Profesional,”hateten Neto.
Tuir na, dalabarak eskola publiku sira kestiona kona-ba osan maibe osan ne’e tama ona iha subsidio eskolar e oinsa mak eskola bele utiliza hodi hala’o izame.
Enkuantu tuir observasaun jornalista iha terenu nota katak iha 25 Jullu, eskola publiku hotu-hotu hahu hala’o izame ba segundu periode e estudante sira tenke ba sedu lahanesan ba-bain.