- Publika iha: 27 Agosto 2011
Tuir Diretor Nasional Planu Estatistika no Teknolojia de Informasaun Ministeriu Edukasaun (ME), Antonio de Jesus katak edukasaun hanesan baze atu atinji objetivu ida tanba ne’e la taka dalan ba sira ne’ebe ho idade produtiva,liu-liu sira ne’ebe la konsege akaba, bele asesu fali ba edukasaun.
Diretor ne’e informa, ME iha ona programa ida ne’ebe oras ne’e ejiste iha Timor laran tomak hodi asesu ba ema sira ne’ebe mak hakarak hetan edukasaun.
“Iha programa ida ne’ebé mak bolu programa ekivalénsia ne’ebé loke iha 65 sub-distritus no 442 sukus ne’ebé mak agora eziste ona iha Timor laran tomak, se sira hakarak dehan eskola ne’e importante ba sira, sira iha direitu atu atu bele ba asesu edukasaun, sira bele kontinua iha ne’eba atu nune’e bele remata ensinu sekundária,”hateten Antonio de Jesus, semana kotuk iha Vila-verde,Dili.
Antonio dehan, kuandu sira hetan valór di’ak husi programa ne’e, sira bele kontinua iha Universidade e la taka dalan ba sira tanba edukasaun ne’e fleksibilidade iha partisipasaun ba demokrasia no edukasaun ne’e ba ema hotu-hotu.
Nia hatutan, ME iha programa prioritáriu ba ema hotu-hotu, ida mak edukasaun adolesente ne’ebé Diresaun Ensino de Corrente mak toma responsabiliza, programa balun mak importante iha ne’ebé mak implementa ona agora mak la’o hela, i oinsa maka sira ne’ebé mak drop-out ne’e sira bele partisipa fali iha prosesu aprendizajen atu nune’e sira remata sira–nia eskola.
Programa ne’e atu fasilita joven sira, no inan-aman sira ne’ebé lahatene lee no hakerek bele aproveita oportunidade ida ne’e atu hetan mos asesu ba edukasaun.
Iha parte seluk Francisca Alves Taolin, hanesan Capacity Building Rede Feto hateten nia parte halo ona rekomendasaun bar-barak kona-ba edukasaun,liu-liu ba feto sira atu asegura partisipasaun feto iha area edukasaun ,liu-liu sira ne’ebe para eskola tanba hetan violasaun sexual sira bele asesu fali ba edukasaun.
Alende ne’e,tuir komunidade Samuel da Silva nia hare katak programa analfabetizmu ba adultus sira ne’ebé ME halo ne’e kapa’as no di’ak tanba bele ajuda sira ne’ebe la remata, bele kontinua eskola no nível sosieddade ne’ebé iha objetivu atu atinji ba futuru.