- Publika iha: 30 Agosto 2013
Iha tempu badak Universidade Nasional Timor –Lorosa’e (UNTL) ho Victoria University sei lansa livru ida kona ba rezultado seminario “future directions for food in Timor-Leste, ne’ebe sai mata dalan ba estudantes atu aprende no pratika tuir.
Iha konferensia ne’ebe hala’o iha 11 to’o 12 Julhu 2013 ne’e, ho topiku kona ba aihan nian, Diretor Departamentu Dezenvolvementu Komunitaria UNTL, Abel Boavida dos Santos, hateten objetivu konferensia ba datoluk ne’e mak, halibur ema hotu nia perspetiva, analiza no rekomenda ba governu atu implementa.
“Materia hotu ami sei publika sai livru ida, ne’ebe bele sai referensia ba estudantes sira iha Timor no ami mos sei hato’o rekomendasaun ba governu atu dezenvolve aihan Timor nian, tanba povu Timor maioria moris ho vida agrikultor,” Diretor dos Santos hateten, iha Sentru Konvensaun, Dili.
Iha konferensia ne’e, nia dehan sira koalia liu kona ba oinsa mak bele promove aihan sira ne’e ba nutrisaun, aplika teknologia iha vida agrikultura nian, tanba povu seidauk iha konesementu kona ba teknologia foun ne’ebe iha.
Entretantu, reprezentante Universidade Victoria, Helen M. Hill, sente urgulhu ho konferensia ne’e, tanba partisipantes barak husi area espesialidade keta-ketak, halibur ideas hamutuk no analiza ba dezenvolvimentu aihan Timor –Leste nian.
Tuir nia, agrikultor sira presiza aprende barak liu tan, liu-liu uja teknikal modern nian oinsa kuda aihoris ne’ebe mak diak.
“Hau hanoin topiku ne’e importante tebes ba Timor-Leste, tanba maske Timor –Leste iha osan maibe ema barak moris iha agrikultura,” Helen dehan.
Enkuantu konferensia ne’e hala’o kada tinan rua, no ho topiku ne’ebe diferente, iha primeira konferensia hala’o iha tinan 2009 no segundu iha 2011, ho topiku jeral kona ba direitus humanus e tinan ida ne’e topiku espesifiku ba aihan Timor –Leste.