- Publika iha: 26 Março 2012
Diretor Eskola Ensino Sekundariu Palaban, Distritu Oe-Cusse, Inacio da Costa hateten oras ne’e dadaun sira nia eskola laiha jis (kapur tulis) no ida ne’e fo impaktu ba prosesu aprendijazen.‘’Ami nia eskola besik semana rua ona, prosesu aprendizajen ladun la’o tanba falta jis, tanba ne’e mak ohin hau mai hato’o relatoriu ba educasaun atu buka nia solusaun, espera katak bele rezolve ho lais atu nune’e alunus sira tuir eskola hanesan babain,’’ hateten Diretor da Costa semana kotuk, iha Distritu Oe-Cusse.
Diretor da Costa salienta tan katak, problema ne’e fo impaktu ba prosesu aprendizajen, tanba educador sira transmite materia liu hosi dikte ka le’e nebe dala barak la fo benefisio ba alunus sira.
‘’Ami tenta rezolve ho metode dikte ka lei deit, maibe dala ruma han tempu barak entaun alunus balun la dun kontente,” diretor ne’e informa.
Entretantu Diretor Educasaun Regional Oé-cusse, Justinho Neno, rekonese katak nia parte siimu ona relatoriu kona ba kestaun ne’e husi Diretor Eskola no nia promete sei relata ba nasional espera katak iha tempu badak bele hetan ona solusaun.
Iha sorin seluk Reprezetante Estudante, Jose Ulan ejiji ba parte kompetente hodi resolve, tanba lak leur tan tama ona prosesu ezame.
‘’Hau husu ba educasaun hodi hare problema ne’e atu rezolve, tanba besik ezame ona, sekarik mestre sira hanorin ami uza sistema lee entaun han tempu barak, klaru ami sei lakon materia ho eskola seluk,” Nia katak.