Quinta, Junho 13, 2024
Total visitors: 766366

Judicial System Monitoring Program (JSMP), husu governu liuhusi Ministériu Justisa (MJ) atu harii sentru dadur juvenil nian iha Timor-Leste.

Judicial System Monitoring Program (JSMP), husu governu liuhusi Ministériu Justisa (MJ) atu harii sentru dadur juvenil nian iha Timor-Leste.

Diretora Ezekutiva JSMP, Ana Paula Marçal, dehan, desde uluk kedan JSMP eziji governu tenke kria sentru dadur juveníl nune’e labele tau dadur ho idade adultu ho idade juvenil sira iha fatin ne’ebé hanesan, maibé tenke iha ida-idak nian fatin.

Nia dehan, labarik ne’ebé mak durante ne’e halo krime, dala ruma sira seidauk maduru, hodi iha sira-nia futuru atu envolve an iha krime, tanba ne’e di’ak liu tau sira iha pozizaun ketak, atu bele aprosima ba juvenil sira-ne’e tuir dalan diferensa ho ema adultu.

“Ita husu ba Ministériu Justisa tenke kria sentru dadur juveníl sira Timor-Leste hodi bele halo atendimentu espesífiku ba dadur juveníl,” Diretora Ezekutiva JSMP Paula dehan.

Entretantu, Ministru Justisa Amandio Benevides hateten iha planu IX governu Konstitusional ne’e tau prioridade hodi konstrui sentru dadur juveníl iha área Tibar, Postu Administrativu Bazartete, Munisípiu Likisá.

“Ita tau ona planu prioridade, atu kria kondisaun ba dadur juvenil sira, tanba ki’ik oan sira ne’ebé mak komete krime, bainhira tau hamutuk ho dadur bo’ot sira, enfrenta duni problema,” nia dehan.

Tanba ne’e nia dehan, tékniku arkitetura na’in rua mai husi team kooperasaun governu Japaun, semana ida hanesan ne’e, sira sei ba vizita fatin ne’ebé prepara iha Tibar, nune’e bele halo dezeñu.

“Depois dezeñu remata ita sei aprezenta para governu Japaun bele apoiu orsamentu liuhusi kooperasaun bilaterál nian, nune’e mós ita sei tau orsamentu balun hodi bele hahu konstrusaun ba sentru dadur juveníl sira,” Ministru Benevides dehan.

Tanba ne’e nia dehan, Ministériu Justisa iha parseru nasaun dezenvolvidu Japaun, liuhusi sira-nia ajénsia ho naran UNAFEL, sira prontu atu apoiu Timor-Leste.