Quinta, Junho 13, 2024
Total visitors: 766366

Embaixadór Uniaun Europeia, iha Timor-Leste, Marc Fiedrich hateten dezafiu bo’ot ne’ebé mundu, partikularmente estadu Timor-Leste enfrenta iha esforsu hapara Violénsia Bazeia ba Jéneru (VBJ) mak halalok violénsia sei hetan aseitasaun iha sosiedade, katak feto barak sei konsidera aktu violénsia ne’ebé sira hetan husi mane sira ne’e normal.

Embaixadór Uniaun Europeia, iha Timor-Leste, Marc Fiedrich hateten dezafiu bo’ot ne’ebé mundu, partikularmente estadu Timor-Leste enfrenta iha esforsu hapara Violénsia Bazeia ba Jéneru (VBJ) mak halalok violénsia sei hetan aseitasaun iha sosiedade.

Nia dehan iha tinan 2020, Uniaun Europea no Nasoens Unidas (UN) lansa projetu initiative spotlight iha Timor-Leste ho objetivu mak atu promove igualidade jéneru, prevene violénsia, apoia sobrevivente sira no rezolve kazu husi violénsia bazeia ba jéneru.

“Ha’u hanoin dezafiu ida mak sidadaun barak seidauk rekoñese violénsia, tantu sira ne’ebé hetan violénsia direita mós dala barak la konsidera ida-ne’e hahalok ne’ebé ladi’ak hasoru sira. Ha’u hanoin ne’e buat ida ne’ebé sai preokupasaun tanba ne’e ho fatin seguru sira-ne’e bele halo diferensia no muda ema nia koñsensia katak aktu violénsia ne’e ladi’ak no presiza halo buat ruma ajuda feto no labarik sira ne’ebé hetan afeta no servisu hamutuk ho mane sira ne’ebé halo violénsia hasa’e sira nia konsiénsia katak aktu ne’e ladiak,” nia hateten hafoin partisipa iha serimónia inaugurasaun fatin seguru iha Sentru Saúde Komunitária Atabae, Munisípiu Bobonaro.

Nia hateten durante tinan rua implementasaun projetu initiative spotlight hatudu iha melloria balun hanesan hasa’e kapasidade sistema nasionál saúde atu responde ba kazu VBJ, liuhusi estabelese fatin seguru iha munisípiu balun no sei estende tan ba fatin seluk atu fó atendimentu médiku ba sobrevivente sira.

Nia hatutan iha parte advokasia konsege advoka governu mellora investimentu ba atividade igualdade jéneru, hanesan elaborasaun kurríkulu ba profesionál saúde sira, Juis sira atu bele trata kazu violénsia bazeia ba jeneru hodi di’ak atu lori justisa ne’ebé justu ba sobrevivente sira.

Nia haktuir esforsu seluk mak halo analiza ba lei prinsipal sira ne’ebé relasiona ho igualidade jéneru hodi buka lakuna sira ne’ebé bele hadi’ak hodi protese liutan feto no labarik feto sira-nia direitu, partikularmente lei kódigu penál tinan 2009, lei kontra violénsia doméstika tinan 2010, lei kodigu sivíl tinan 2011 no lei kódigu laborál tinan 2012.

Nia informa investimentu ba projeitu initiative spotlight iha nivel mundial ho total orsamentu millaun 500 euro, partikularmente ba Timor-Leste ho orsamentu millaun 15.

Entertantu, Reprezentante UNFPA, iha Timor-Leste, Pressia Arifin-Cabo hateten la’ós de’it rekoñesimentu ba violénsia ne’ebé akontese, maibé aseitasaun violénsia iha sosiedade Timor-Leste sei makas tanba ne’e númeru violénsia bazeia ba jéneru sei aas, kuaze 33% feto ho idade 15 até 49 iha esperensia hetan violénsia fisiku husi sira-nia parseru intimu.

“UNFPA nia hanoin la’ós de’it laiha rekoñesimentu violénsia hanesan problema no krime ida. Maibé dala barak mós iha sosiedade laran ita sei aseita no simu forma violénsia sira. Ha’u-nia espriénsia iha globál no iha Timor-Leste importante ita atu rekoñese no la aseita ka la simu kualker forma violénsia hotu-hotu ne’ebé akontese ba ita ida-ida,” nia hateten.

Nia hateten sira iha komitmentu nafatin servisu hamutuk ho institusaun governu sira no sosiedade sivíl sira atu haforsa sistema referral no apoia ba sobrevivente sira, liu-liu reforsa sistema saúde intermus kria espasu seguru iha fasilidade saúde sira, fó formasaun ba profesionál saúde sira kona-ba atendimentu ba kazu VBJ no oinsá halo referal ba kazu sira atu hetan tulun no apoia di’ak liutan.

Iha parte seluk, Komadante Polísia Munisípiu Bobonaro, Antonino Mauluta hateten violénsia bazeia ba jéneru no violénsia doméstika ne’e krime públiku, katak se de’it mak haree bele kontaktu polísia atu halo atuasaun.

“Durante ne’e ita PNTL sempre halo responde no atuasaun ba kazu violénsia bazeia ba jéneru no violénsia doméstika tanba ita-nia kazu ne’e tama iha krime públiku la’ós semi públiku. Entaun bainhira kazu mosu iha bairo no uma-kain laran la presiza vítima direita mai halo keixa, maibé viziñu balun bele telephone polísia ami halo atuasaun kedas tanba ne’e krime grave,” nia hateten.

Nia dehan durante ne’e bainhira iha kazu ruma hetan agresaun fisiku no violénsia seksual, liña primeru mak parte saúde atu halo tratamentu no ezaminasaun. Depois passa ba fali ba polísia atu koordena ho uma mahon Maria Tapo atu asegura sobrevivente seguru hodi prosesu kazu ba oin.