Domingo, Abril 21, 2024
Total visitors: 766366

Xefe Gabinete Kontrolu Kualidade no Komunikasaun Sosial, iha Hospital Nasionál Guido Valdares (HNGV), Díli, Sara Maria Xavier informa períodu tinan 2022, sala maternidade rejista inan na’in 21 husi totál inan isin rua na’in 5274 mak mate tanba hetan komplikasaun.

Xefe Gabinete Kontrolu Kualidade no Komunikasaun Sosial, iha Hospital Nasionál Guido Valdares (HNGV), Díli, Sara Maria Xavier informa períodu tinan 2022, sala maternidade rejista inan na’in 21 husi totál inan isin rua na’in 5274 mak mate tanba hetan komplikasaun.

“Inan ne’ebé mate durante tinan 2022, hamutuk na’in 21. Kazu sira-ne’e kauza husi komplikasaun ne’ebé inan sira sofre hanesan ran fakar, infesaun ka sepsis, partu prolongadu, hipertensaun ka koñesidu ho preklamsia several no eklamsia,” nia hateten iha servisu fatin Bidau, Díli.

Nia dehan maioria inan sira ne’ebé mai partu iha hospital nasionál ne’e ho partu normal purvolta na’in 3512, iha balun ne’ebé partu ho operasaun sesariana no partu ventoja ka utiliza instrumentu hodi ajuda hahoris bebé.

Nia hateten polítika ka matadalan kuidadu ante natal foun, mínimu inan ida bainhira gravida tenke konsulta isin-rua ba fasilidade saúde dala ualu. Maibé di’ak liu mós fulan-fulan atu bele kontrola di’ak liutan ba kondisaun saúde bebé iha isin no inan nia saúde rasik.

Nia haktuir dalabarak apoia família, liu-liu laen nian ba inan isin rua sira sei mínimu tebes tanba inan sira mesak mak ba fasilidade saúde konsulta isin-rua la hetan akompañamentu husi laen sira.

Iha parte seluk, Membru Parlamentu Nasional Deputada Elvina Sousa hateten kazu mortalidade inan no oan ne’e akontese barak, hanesan iha loron hira liuba inan isin rua ida transfere husi postu-administrativu Loloteo munisípiu Bobonaro mai hospital nasionál, Díli, inan no oan mate iha dalan.

Nia salienta kestaun ida-ne’e refleta kualidade servisu prestasaun saúde iha rai-laran, liu-liu servisu atendimentu kuidadu ante natal no kuidadu pós-natal ba inan sira.

“Ami bolu ita bo’ot sira atu husu ita bo’ot sira-nia atensaun favor ida hasa’e kualidade husi servisu no hasa’e koñesimentu pesoál saúde sira-nian hodi fó atendimentu ne’ebé di’ak tebes ba kuidadu ante natal no kuidadu pós-natal, ne’e mak importante tebes,” nia dehan.

Nia hateten atu asegura kondisaun saúde inan nian no bebé moris ho kondisaun di’ak no salva, ne’e liuhusi servisu kuidadu ante natal ne’ebé kualidade.