- Publika iha: 24 Novembro 2022
Prezidente Komisaun Funsaun Públika (KFP), Faustino Cardoso Gomes, hateten kargu diresaun xefia iha administrasaun públika, liu-liu rejime jerál nian hamutuk 3812, feto okupa de’it 21,9% sei nafatin domina husi mane ho 78%.
Nia salienta entidade sira hotu, liu-liu media tenke halo sensibilizasaun makaas liu tan atu enkoraja feto sira atu kompete iha vaga sira ba kargu diresaun xefia nian iha administrasaun públika tanba esperiénsia hatudu feto iha potensialidade domina mane sira, maibé la kompete.
“Mane sira labele orgullu no sombong tanba feto sira agora hakas aan hela sai mandiri no hatudu sira bele. Iha realidade komisaun halo teste feto sira-nia pursentajen ne’e relativamente aas liu kompara ho mane sira. Maské to’o ohin loron sei ki’ik ita sempre enkoraja feto sira-nia partisipasaun hahú husi prosesu kandidatura ba kargu diresaun xefia nian, nune’e mós ba prosesu partisipasaun iha teste konkursu sira atu destaka aan kompotente hodi hatudu feto bele,” nia hateten bainhira partisipa iha serimónia komemorasaun loron nasionál feto ba dala 46, iha CCD, Díli.
Nia rekomenda mós ba superiór másimu sira husi ministériu ida-idak atu konsidera partisipasaun feto, bainhira avansa ho proposta nomeasaun substituisaun sira tanba prosesu ne’e la liuhusi selesaun purméritu.
Nia hateten dadus atuál hatudu totál funsionáriu públiku hamutuk 36,406, ne’ebé reprezentasaun feto iha de’it 35.2% no mane iha 64.8%. Signifika seidauk iha balansu
Nia hatutan iha mós funsionáriu kontratadu kazuál iha ministériu sira hamutuk 7,000. Iha komponente ne’e mós reprezentasaun feto menus tebes tanba seidauk fó atensaun no konsiderasaun ba feto.
Iha parte seluk, Feto Potensiál, Alzira Reis observa feto nia reprezentasaun iha pozisaun lideransa nian iha mudansa no progresu di’ak, maibé iha nível nasionál de’it.
Nia dehan iha nível baze, liu-liu munisípiu to’o suku reprezentasaun feto iha kargu diresaun xefia sei menus tebes.
“Ha’u hanoin katak se ita hakarak kouta 30% ne’e hanesan asaun afirmativu tenke implementa iha setór hotu tanba dalabarak ita haree feto lideransa iha ezekutivu iha, maibé oinsá partisipasaun feto foti desizaun iha nível sira ne’ebé la’ós ezekutivu hanesan diretora, xefe departamentu,” nia hateten.
Nia hateten komisaun tenke altera lei funsaun públika kona-ba reforma nian tanba dadaun reforma la’ós obrigatóriu, entaun feto sira ne’ebé hasai ona kursu labele tama iha administrasaun públika.