Quinta, Dezembro 08, 2022
Total visitors: 692025

Prezidente Autoridade Munisípiu Bobonaro, Ernesto de Oliveira Barreto hateten tuir orientasaun Primeiru-Ministru Taur Matan Ruak, programa Uma Kbi’it Laek (UKL) plus A konsentra de’it iha postu administrativu Balibo, liu-liu suku Kova no Batugade área Badutmean tanba kondisaun uma ne’ebé família sira hela la ho dignu.

Prezidente Autoridade Munisípiu Bobonaro, Ernesto de Oliveira Barreto hateten tuir orientasaun Primeiru-Ministru Taur Matan Ruak, programa Uma Kbi’it Laek (UKL) plus A konsentra de’it iha postu administrativu Balibo.

Nia salienta programa Uma Kbi’it Laek iha tipu rua mak tipu UKL plus A, signifika halo konstrusaun uma foun no tipu UKL plus B katak uma ne’ebé kondisaun kalen aat ona presiza troka.

“UKL plus A iha postu Balibo de’it, tanba Primeru-Ministru nia vizita ida mai iha Badutmean haree uma sira iha ne’ebá la merese (layak) ona atu ita-nia populasaun sira hela. Entaun Primeru-Ministru propoin mai munisípiu UKL plus A ho uma 75 ne’e implementa hotu iha área Badutmean, maibé depois halo survei iha uma 35 mak iha Badutmean, tanba ne’e uma 40 seluk fahe ba suku haat seluk,”nia hateten iha Balibo.

Prezidente dehan postu administrativu Balibo iha suku neen mak suku Batugade, Kova, Balibo Vila, Leohitu, Leolima no Sanirin tanba ne’e suku ne’ebé sei hetan mos UKL plus A mak suku Balibo Vila uma 10, suku Leohitu uma 10, suku Leolima uma 10 no suku Sanirin uma 10.

Barreto hateten konstrusaun ba uma sira ne’e 80% remata ona, liu-liu iha área Badutmean suku Kova no Batugade, maibé ba suku seluk seidauk hahú tanba problema tékniku no klima, liu-liu udan laiha asesu ba transporte.

Nia hatutan UKL plus B nian fó ona orientasaun ba autoridade postu no suku sira atu halo identifikasaun ba komunidade nia uma ne’ebé kondisaun kalen aat no laiha kbi’it atu hadia bele hetan apoia materiál kalen hodi troka.

Iha parte seluk, Xefe Aldeia Rai Ulun Suku Leohitu Postu Administrativu Balibo Munisípiu Bobonaro, Mariano dos Reis hateten uma iha área Badutmean suku Kova no Batugvde barak mak sei du’ut no kondisaun la favorese ona, tanba ne’e governu deside fó prioridade ba sira.

Xefe Aldeia Rai Ulun afirma deklarasaun Primeiru-Ministru nian katak uma tali sira ne’ebé iha fronteira troka hotu no área ne’ebé besik liu Atambua, Indonézia mak área Badutmean.

“Uma 35 ne’e iha de’it suku Kova no Batugade, lahatene uma 40 seluk ne’e sei fahe ba suku ne’ebé seidauk,” nia hateten.