Quinta, Dezembro 08, 2022
Total visitors: 692025

Diretora Ezekutiva Servisu Autonomu Medikamentu no Ekipamentu Saúde (SAMES), Santana Martins informa aimoruk ba moras mentál nian, kompaña sira hatama hotu ona, maibé kuantidade mak ki’ik labele responde ba nesesidade hotu.

Diretora Ezekutiva Servisu Autonomu Medikamentu no Ekipamentu Saúde (SAMES), Santana Martins informa aimoruk ba moras mentál nian, kompaña sira hatama hotu ona, maibé kuantidade mak ki’ik labele responde ba nesesidade hotu.

Nia dehan liuhusi Orsamentu Jerál Estadu (OGE) tinan 2022, Parlamentu Nasional aloka orsamentu ho montante $250,000 hodi sosa medikamentu psikiatria.

“Orsamentu ne’ebé Parlamentu Nasional fó $250,000 de’it no ita presiza tan $280,000 ba programa saúde mentál atu kobre hotu, ne’e mak ita-nia situasaun, katak sasan sira mai, maibé kuantidade la sufisiente nafatin,” nia hateten.

Nia hateten aimoruk item hitu mak tama ona iha SAMES no sira halo ona komunikasaun ho responsável programa mentál sira iha munisípiu no hospital sira atu bele halo distribuisaun bazeia ba pedidu ne’ebé tama no kuantidade ne’ebé iha.

Diretora Martins hatutan aimoruk ne’e mak hanesan Domipramina HCL 250 mg, Clorpromazine, Amitriptyline, Fluoxetine, no Trifluopenagine I.P 5 mg.

Iha parte seluk, Médiku Psikiatra, iha Sentru Aguda Hospital Nasional Guido Valdares (HNGV), Doutor Edmundo Monteiro husu SAMES atu aselera prosesu verifikasaun hodi halo distribusaun, tanba sira presiza aimoruk sira ne’e hodi fó tratamentu ba pasiente sira.

“Karik tama ona, maibé seidauk mai iha ami, liu-liu aimoruk Olanzapine, Amitriptyline, Fluoxetine, Alprazolam, Diazepam, tanba ami iha mak Clorpromazine de’it,” Dr. Edmundo hateten.

Nia dehan pasiente ne’ebé ho kondisaun agresivu presiza apoia tratamentu medikamentu atu estabiliza sira-nia hanoin.