- Publika iha: 14 Dezembro 2021
Diretor Ezekutivu Associação Deficientes de Timor-Leste (ADTL), Cesário da Silva hateten governu tenke kria kondisaun ba ema ho defisensia sira atu bele partisipa maximu iha prosesu elisaun presidensial no parlamentar tinan 2022.
Nia dehan kondisaun ne’ebe ema ho defisensia presiza mak asesibilidade ba informasaun edukasaun sivika ba votantes ho lian jestual, asesu ba fatin sentru votasaun no prepara bulletin votus ho letra braille atu ema ho defisensia matan bele votu ho sekretu.
“Ami nia rekomendasaun asegura partisipasaun maximu ema ho defisensia nian, liu-liu melhora kondisaun fisiku iha fatin estasaun votasaun sira atu ema ho defisiensia fisiku fasil asesu. Ami mos rekomenda ona atu halo sensibilizasaun informasaun inklui mos lina jestual atu defisensia tilun sir abele akompaña no presiza imprime bulletin votus ho letra braille atu ema ho defisensia matan sira bele vota segredu, se lae nia hakarak ida ema tu’u fali seluk,” nia hateten iha Comoro, Dili.
Nia dehan sira halo ona advokasia ba ministerio relevante sira inklui CNE no STAE atu konsidera no prepara kondisaun sira ba ema ho defisensia sira tanba tuir dadus sensu uma kain tinan 2015, hatudu total defisensia iha rai laran hamutuk 38,000 no sira iha direitu.
Iha parte seluk Diretur Nasional Protesaun no Promosaun Direitu Ema ho Defisensia, iha Ministerio Solidaridade Sosial no Inkluzaun (MSSI), Mateus da Silva hateten sira hare hela mekanismu hodi reforsa kontrolu no monitorizasaun ba implementasaun politika nasional ba ema ho defisensia nian atu ema ho defisensia sira bele goja sira nia direitu hanesan mos sidadaun sira seluk.
Nia dehan governu liu husi ministeriu save sira fo atensaun makas hela ba asuntu asesbilidade ba ema ho defisensia nian, liu-liu infrastruktura sira tanba asesibilidade sai barreira hodi impende partisipasaun ema ho defisensia nian.
“Ita hare maluk defisensia balun mos involve aan ona iha partidu politiku. Ita ema tekniku n’eebe servisu ba asuntu defisensia nian hare sira to’o iha nivel ida ne’e ita sente buat ne’ebe ita halo iha duni rezultadu balun,” nia hateten.
Nia hateten faktus sira iha mundu hatudu ema ho defisensia barak sai lider hanesan presidente no ministru sira tanba sira iha kapasidade no abilidade, entau presiza kria kondisaun sira ne’ebe fo asesiblidade ba sira hodi partisipa ativu liu tan iha dezenvolvimentu iha rai laran.