- Publika iha: 22 Setembro 2021
Membru Parlamentu (MP), Deputado Adriano do Nacimento hateten governu tenke halo investigasaun profunda ba kauza ema mate barak iha komunidade no utiliza prova ida ne’e hodi konsiensializa komunidade konaba ezistensia no perigu surtu Covid-19 nia variante Delta tanba agora dadaun loron ida ema nain 10 resin maka mate.
Nia salienta ema mate barak bele kauza husi infesaun Covid-19 tanba evolusaun surtu Covid-19, liu-liu variante Delta iha rai laran dezkontroladu ona, maibe presiza informasaun ne’ebe lolos atu konvense komunidade.
“Hau husu governu halo investigasaun klean ba postu Administrativu Quelekai no Fohorem Suai tanba ema katuas ferik sira ho idade tinan 60 ba leten mate nabnaba kauza husi mear dada iis ladiak. Covid-19 nia sintoma ida maka dada iis ladiak,” nia hateten liu husi plenaria iha parlamentu nasional, Dili.
Nia apela ba komunidade sira atu konsente Covid-19 iha duni no perigu tanba nia ho familia mos hetan infesaun Covid-19, maibe ho vasina kompletu bele rekupera husi kondisasun grave.
Nia hateten seidauk iha aimoruk atu kura moras ida ne’e, maibe iha vasina atu bele fo imunidade forte hodi bele minimiza risku mortalidade tanba ne’e ema hotu tenke ba vasina kompletu.
Entretantu, Deputado Domingos Carvalho hateten sidadaun sira trauma tanba dadus hatudu numeru ema ba hospital menus, maibe kuaze lorloron ema barak mate deit iha sira nia uma.
“Agora ita hare sala sira ema toba nian mamuk barak, maibe mate aumenta barak liu tan. Kuaze lorloron mate barak no sira mate iha uma laos iha hospital tanba ema tauk ba konsulta iha hospilta ne’eba teste positivu Covid-19,” nia hateten.
Nia hateten governu iha obrigasaun atu buka solusaun ba kestaun ida ne’e labele husik deit ema mate deit hanesan ne’e iha uma.
Iha parte seluk, Ministra da Saúde, Dra. Odete Maria Freitas Belo hateten ekipa ministerio hamutuk ho autoridade lokal sira halo hela investigasaun ba kazu mortalidade iha postu administrativu Quelekai no fatin seluk tan.
“Hau husu ona pesoal saúde iha munisipiu Baucau atu fo informasaun konaba numeru lolos ema mate iha Quelekai ne’e hira no sira mate tanba sa,” nia hateten.
Nia apela ema hotu atu labele tauk ba hospital, wainhira kondisaun moras tanba atu hetan kura no rekuperasaun iha sentru saúde sira no hospital.