SEPS Suspende Apoiu Humanitaria Ba Vitima Dezastre Naturais

Sekretariu Estadu Protesaun Sivil (SEPS) suspende provizoria apoiu humanitaria ba vitima dezastre naturais tanba stock sasan iha armazem la iha ona.

SEPS Joaquin Gusmao Martins hateten, sasan hodi apoiu ba vitima dezastre naturais oras ne’e dadaun stock iha armazem mamuk ona tanba ne’e governu deside hapara provizoria apoiu humanitaria ba vitima sira liu-liu iha munisipiu Dili.

“Ita nia sasan tanto food, non-food iha armazem SEPS mamuk ona tanba ne’e vitima dezastre naturais sira iha Dili ne’ebe mak seidauk apoiu ne’e ita suspende provizoria lai,” SEPS Gusmao dehan iha knar fatin Dili.

Nia dehan, tuir dados ne’ebe sira rejistu, vitima afetadu ba dezastre naturais iha kapital Dili hamutuk 236.379 husi ne’e balu simu ona apoiu humanitaria balun seidauk tanba stock sasan la iha ona.

“Vitima sira ne’ebe seidauk hetan apoiu ne’e, governu nafatin esforsu liu husi ezekusaun orsamentu ratifikativu ne’ebe mak promulga ona, nune’e hodi bele sosa sasan hodi kuntinua fali apoiu humanitaria,” nia hateten.

Alende ne’e nia dehan, vitima dezastre naturais maioria hetan ona apoiu, balun deit mak seidauk tanba stock la iha ona liu-liu iha Dili, munisipiu seluk apoiu hotu ona.

Entretantu Xefe Suku Comoro, Eurico de Jesus hateten vitima dezastre naturais iha suku laran kuaze 1,000 resin, sira ne’e hetan hotu ona apoiu husi governu konaba nesesidade bazika sira no oras ne’e dadaun sira balun fila ona ba hela fatin rasik.

“Maibe ita nia komunidade sira iha area Tasi tolu area Maslidun oras ne’e dadaun sira kuntinua hela iha tenda ne’ebe governu prepara tanba sira nia uma sei nakou ho be’e,” Xefe Suku Jesus dehan.

Tanba ne’e husu governu atu apoiu ekipa husi grupu individu balun ne’ebe mak oras ne’e esforsu hela hodi normaliza be’e nune’e vitima sira bele fila ba sira nia uma, hodi hein bairu foun ne’ebe mak governu prepara hodi koloka vitima sira.