Asesu Ba Nutrisaun Diak, Ne’e Direitu Fundamental Labarik Nian

Publika iha: 13 Dezembro 2012

Asesu ba nutrisaun diak nudar direitu fundamental labarik nian maibe realidade labarik barak sei mal nutrisaun.

Iha Konvensaun Direitu Labarik artigu 24; estadu parte ida rekonese direitu labarik nian atu garantia saúde labarik nian, fasilidade tratamentu moras no rehabilitasaun saúde, no mal nutrisaun maibe realidade labarik pursentu 54 mak afetadu mal nutrisaun tanba moris iha vulnerabilidade la asesu ba aihan ne’ebe ho nutrisaun diak nune’e mos komunidade laiha konesementu atu fo aihan ne’ebe ho kualidade ba oan sira atu garantia sira nia saúde.
“Hau hanoin problema mal nutrisaun ne’ebe sae makas presiza atensaun ne’ebe seriu husi governu kompotente tanba governu ratifika ona konvensaun direitu labarik nian iha artigu balun mak garantia saúde labarik, sira iha direitu asesu ba nutrisaun ne’ebe diak atu garantia dezenvolvimentu sira nian tanba ne’e governu kria politika ida seriu atu fo atensaun ba asuntu ne’e ho razaun mal nutrisaun afeta ba labarik sira nia kakutak perigozu,” dehan Program Manager Forum Tau Matan (FTM), Honorio Almeida, (05/11), iha Kaikoli, Dili.

Nia dehan, mal nutrisaun sa’e maka’as tanba Povu Timor-Leste barak liu-liu feto sira sei moris iha mukit no kiak nia laran, difisil hetan aihan ne’ebe ho kualidade diak ba labarik sira nia saúde nune’e mos inan isin rua sira tanba tuir peskiza Demography Health Survey Ministeriu saúde 2009-2010 43 pursentu inan isin rua afetadu mal nutrisaun fo impaktu ba dezenvolvimentu labarik nian.

Alende ne’e Inan husi oan ne’ebe afetadu mal nutrisaun, Matilda Amaral hateten sira nia oan sai vitima ba mal nutrisaun tanba sira laiha osan ne’ebe sufsiente hodi aihan ne’ebe ho kualidade diak.
“Ami iha aihan hanesan modo tahan no seluk tan maibe ami laiha konesementu kona ba menu aihan ne’ebe diak ezemplu dader han saida, lokraik saida no kalan nian tanba hahan ne’ebe ho nutrisaun tenke iha menu ne’ebe diak,” dehan Amaral.

Entretantu Komisaun Nasional Direitu Labarik, Komisaria Adalgisa M. S. Ximenes katak KNDL sei nafatin halo promosaun ba direitu labarik iha entidade hotu, asiste nafatin programa governu nian atu hare kestaun labarik nian ne’ebe presiza tau atensaun maka’as.

“Foin dadaun iha 20 de Novembru ami halo esforsu ida iha distritu Maliana atu koalia ho governu sira iha area espesifiku hanesan Justisa, Saúde, Edukasaun, being estar labarik nian no progresu ne’ebe sira halo ona no saida mak sira sei halo atu asegura direitu labarik,” dehan Komisaria ne’e. n