- Publika iha: 13 Dezembro 2012
Tuir Organizasaun Non Governmental Forum Tau Matan (FTM) ne’ebe tau matan ba direitus umanu iha rai laran konsidera estadu Timor –Leste la iha seriadade atu proteje direitu labarik iha aspeitu hotu tuir kontiudu konvensaun direitu labarik ne’ebe estadu ratifika ona tanba realidade labarik kontinua sai vulneravel ema viola sira nia direitu hanesan labarik involve servisu todan, explorasaun ekonomiku no seluk tan.
Tuir nia, ida ne’e mak frakeza ne’ebe governu Timor –Leste iha tanba maske ratifika ona konvensaun direitu labarik artigu 32, konvensaun ne’ebe Estadu Timor-Leste ratifika sai matadalan atu asegura direitu labarik nian hateten katak estado parte ida rekonese direitu labarik nian atu hetan protesaun hasoru explorasaun ekonomia no hasoru servisu hotu ne’ebe perigu ka intrope ho labarik nia edukasaun ka halo aat ba saúde ka dezenvolvimentu fiziku, mental, espiritual, moral ka social labarik nian.
“Estadu sei hola medidas lejislativu administrative, social no edukasau sira nian atu garante katak artigu ida ne’e bele la’o maibe realidade la tau importansia atu kumpri mandatu sira ne’e,” Program Manager FTM ne’e kritika.
Nia dehan, kuandu governu la tau importansia hodi kria politika ne’ebe klaru signifika katak estadu no governu mak viola konvensaun ne’ebe ratifika ona no viola direitu labarik iha rai laran.
Iha parte seluk Octaviano Mariano (13), ne’ebe loron-loron fa’an manu tolun haleu sidade, sente kontente tebes ho servisu ne’ebe nia hala’o maske ho idade ne’ebe minoridade tanba hetan osan oituan hodi sustenta nia vida moris.
“Hau hakarak ba eskola hanesan hau nia kolega sira seluk maibe hau labele tanba hau laiha osan atu hola farda no instrumentu eskola nian hanesan kadernu, lapis no seluk tan diak liu hau faan ema nia manu tolun hodi hetan osan oituan atu hatutan hau nia moris,” dehan Mariano.
Entretantu Komisaun Nasional Direitu Labarik (KNDL), Komisaria Adalgisa M. S. Ximenes rekonese katak kestaun ida ne’e la diak ba situasaun labarik nian tanba iha deklarasaun universal direitus umanus no konvensaun direitus labarik artigu balun deklara estadu parte ida atu fo protesaun ba labarik sira iha aspeitu oioin inklui mos trabalhu infantile.
“Ita koalia kona ba direitu labarik asesu ba edukasaun ema balun hateten katak haruka labarik ida ba eskola gratuita ne’e labarik hakonu ona sira nia direitu asesu ba edukasaun maibe bainhira ita hateten katak labarik ne’e goza nia direitu nia tur iha kadeira meja atu estuda, iha profesores ne’ebe kualidade, livrus, infra-struktura ne’ebe adekuadu ba sira atu estuda ida ne’e mak it abele dehan labarik goza sira nia direitu,” dehan Komisaria Ximenes.
Nia hatutan katak estadu ratifika konvensaun sira ne’e la’os buat hotu lalao iha parte balun mak lao dadaun ona no barak mak seidauk la’o no sira (KNDL) sei esforsu atu halo advokasia nafatin atu governu relevante sira bele tau atensaun ba kestaun sira ne’e .
Nia informa katak KNDL laiha poder atu atende problema labarik direitamente maibe KNDL nia papel importante mak fo hanoin ba entidade hotu inklui mos estadu, governu no inan aman sira atu labele viola labarik sira nia direitu maibe realidade akontese nafatin la’os estadu mak haruka sira iha dalan ninin maibe ne’e mak situasaun Timor-Leste nian.