- Publika iha: 11 Dezembro 2012
Iha tempu agora feto mos komesa hatudu nia abilidade no kontribuisaun atu compete iha aspeitu hotu-hotu, balun involve iha vida politika no balun iha vida negosiu ka bisnis e balun sai susesu iha vida negosiu hanesan feto maluk Deolinda da Cunha no Keathlen Gonsalves, sira nain rua sai nain ba sira nia negosiu rasik ne’ebe agora hetan susesu bo’ot.Feto maluk Deolinda da Cunha nudar Diretora Ezecutivu ba nia negosiu rasik ne’ebe hanaran Diak Printing ne’ebe agora dadaun hola fatin iha Timor Plaza, antes ne’e feto maluk ne’e mos hasoru dezafiu oi-oin maske nune’e nia la lakon esperansa no ikus mai susesu duni e tuir nia bisnis la’os foun ba nia.
“Hau desde ki’ik halao’o ona bisnis ki’ik oan sira tanba hau nia aman mos ema bisnisman ida, uluk ami halo bisnis kafe tanba ami husi Ermera ne’ebe kafe barak, depois ba iha Portugal, ami mos iha loza ida iha ne’eba tanba ami uluk hela iha Portugal, maske uluk ami eskola maibe ami sempre iha tempu atu ajuda ama no apa halo’o bisnis,” konta Bisnis Women ne’e, foin lalais iha Timor Plaza, Dili.
Bazea ba esperiensia ne’ebe iha iha vida negosiu, Deolinda deside atu hala’o bisnis mesak, mesmu iha bisnis nia laran sempre iha difikuldade maibe ne’e la’os buat ida ne’ebe maka halo nia tauk atu hala’o vida nudar Bisnis Women. “Hau nia aman sai inspirador mai hau atu kontinua hala’o bisnis, uluk hau mai iha Timor no loke kompania ho naran Diak Printing, ne’e halai liu ba oinsa cetak lia fuan iha kamizola, halo dezenhu, tanba sa maka hau loke bisnis ne’e la’os dehan tanba hetan osan barak maibe ho printing bele lori ita nia naran, ita nia motives, maske dalaruma ita labele espresa, maibe husi kamizola it abele espresa motive Timor ne’ebe uniku iha ita nia rain, ema iha liur mos bele halo maibe la hanesan,” konta Bisnis Women ne’e.
Husi bisnis ne’ebe nia hala’o, kada fulan nia hetan rendementu ne’ebe bo’ot maske nune’e la taka dalan mos hetan rendementu ne’ebe ki’ik tanba bisnis depende ema sosa konsumidores sira mai cetak sira nia kamizola.
“Agora iha plaza kada fulan ami hetan lukru maizumenus doiz mill, depois osan ne’e balun sei uza ba selu Timor Plaza, ne’ebe lukru ladun barak ida maibe hau senti kontenti nafatin ho hau nia bisnis ne’e,” dehan Deolinda.
Mesmu hala’o bisnis sita nia tempu barak, maibe nudar inan husi oan nain tolu no nudar fen ida,nia nunka abandona nia familia, sempre fahe ba nia familia hanesan loron Domingu bele pasa ferias hamutuk e Deolinda rasik iha mehi ida atu export bisnis ne’ebe maka nia iha ne’e ba rai liur hanesan ba Nasaun Comunidade Paizes da Linggua Portugues (CPLP). Tanba tuir nia, liu husi bisnis ne’e bele kontribui mos ba dezenvolmentu nasaun Timor-Leste.
Iha lidun seluk Feto Timor ida ne’ebe maka asumi kargu nudar Bisnis Women mos, ne’e konesidu liu ho naran Keathlen Gonsalves, hanesan mos Deolinda ne’ebe susesu hotu iha vida negosiu. Susesu feto nain rua iha negosiu ne’e atu hatudu katak feto mos bele foti parte iha dezenvolmentunNasional liu-liu iha area bisnis. Keathlen rasik konese mundu bisnis desde idade tinan 7, ne’e duni ba nia bisnis nudar profisaun ida.
“Hau nia background husi hau nia familia tomak mai husi bisnis, halo negosiu. Hau komesa hahu negosiu maijumenus hau nia tinan hitu, hau nia inan aman nia vida tomak ne’e halo negosiu iha Ermera, ne’ebe kuandu tempu kafe nian ami bisnis kafe, no loron bailet fa’an nahe sira bai-bain ba povu sira iha Lete Foho para atu hare mos povu sira nia moris iha tempu ne’eba. Iha tempu ki’ik ami eskola dadersan, no meudia kuandu fila uma ajuda inan aman hare sasan iha loza, hanesan sasan ki’ik-ki’ik sira,” konta Bisnis Women Keathlen Gonsalves.
Keathlen rasik nudar nain ba Loza Acait, no bisnis lubuk ida iha Timor-Leste hahu husi Mini Market to’o Supermarket, no bisnis Totobola (liafuan Portuges) hanesan bileti, bisnis marketing Accounting ba Forsa sira inklui restaurant ida iha akait nia laran. Ermera Oan ne’e, loke bisnis sempre hatene saida maka Konsumidores sira presiza, no saida maka merkadu hakarak, ho maneira ne’e dala ruma halo nia sai ema bisnis women ne’ebe maka susesu.
“Hau iha kedas esperiensia kuandu hau hakat tama iha merkadu iha Timor-Leste hau hakat iha konfiansa bo’ot ida, hau hatene hau emprezaria hau hatene saida maka merkadu preszja, ne’e ba hau nia planu. Hanesan uluk hau mai iha Timor-Leste hau hare UN barak antaun hau hetene katak sira persija restaurant tuir sira nia hahan antaun hau loke restaurant ida iha akait, no hau hetan lukru nebe maka hau bele dehan bo’ot,” dehan Bisnis Women ne’e.
Nudar Inan ba oan nain rua, no ukupadu ho bisnis nebe maka persija los nia tanba nia maka tun rasik atu zere, maibe la’os dehan katak nia tenke haluha nia knar nudar inan no nudar fen ida.
“Hau sempre maneija tempu ba kestaun ne’e, tanba ida ne’e mos importante, hau sempre fo atensaun ba hau nia kaben no ba hau nia oan sira, ne’ebe laiha problema kona ba ida ne’e,” dehan Keathlen.
Tanba ne’e nia apela ba Emprezaria sira, wainhira halo negosiu, labele dehan katak ema seluk halo negosiu ne’ebe hakarak hotu atu halo negosiu, ne’e ladun diak. Presiza iha planu ne’ebe maka diak, no presiza iha konsiensia ne’e maka importante. n