Membru F-FDTL Barak Involve Iha Violensia

Tuir monitorizaun hosi NGO nasional Belun, identifika katak iha tinan 2012 iha membru F-FDTL nain 15 involve iha violensia ne’ebe maka sira halo hasoru komunidade sira ne’ebe akontese iha distritu sia.

“Violensia sira ne’e akontese iha distritu Dili, Bobonaro, Covalima, Oe-Cusse, Ermera, Liquisa, Viqueque,  no Distritu Manufahi,” dehan Program Manager  Marilia Oliveira da Costa, iha nia knar fatin, (03/11).

Tuir nia, iha distritu Dili  dia 18 de Fevereiru 2012, iha Aldeia Lao Rai, Suku Kuluhun, Sub-distritu Cristu Rei, akontese insidenti Membru F-FDTL hamutuk ho joventude nain ida halo asaltu  fisik ba joventude ida wainhira membru F-FDTL soke joventude ne’e ho motor.

“Impaktu mane ida hetan kanek. kazu ne’e hato’o ona keixa  ba iha polisia no seluk fali.  Iha dia 10 de Marsu 2012, iha Aldeia Oplegul, Suku Holsa, Sub-distritu Maliana, akontese grupu deskuñesidu balu tuda kareta EDTL Sub-Distritu Maliana. Wainhira akontese pesoal EDTL, telephone direitamente ba F-FDTL Postu Tunibibi hodi tun ba halo situasaun, maibei grupu sira ne’e halai lakon hotu. Mumentu ne’e iha mos joven nain tolu ne’ebé ho kondisaun lanu kaer hela botir hodi hakilar iha area EDTL katak tanba sa mak ahi mate, tanba ne’e element F-FDTL balu baku joven sira ne’e to nain ida hetan kanek. Kazu ne’e rasik Polisia halo ona prosesu investigasaun,” dehan Program Manager ne’e.

Nia mos hatutan katak, Iha dia 1 de Abril 2012,  iha tuku  sanulu resin rua kalan, iha Aldeia Fatuk oan, Suku Holpilat, Subdistritu Maucatar, Distritu Covalima, akontese kazu  membru F-FDTL ida baku mane  ida to nihan ida tohar. Fontes informasaun katak kazu ne’e akontese wainhira Komandante Polisia Distritu Covalima telefone ba F-FDTL atu bele halo kapturasaun ba  grupu sira e’ebé involve iha konfrontasaun  iha  dia 1 de Abril 2012,  lokraik, Aldeia Akar Laran, Suku Suai Loro, Subdistritu Suai Vila. Maibei wainhira F-FDTL ne’e bá lahalo kapturasaun ba ema ne’ebé involve iha konflitu,  ba fali iha mane ne’e nia uma hodi halo asaun baku to nihan ida monu kedas.

Iha lidun seluk, deputada Camelita Caitanu Moniz hateten, ne’e nudar krimi ida, ne’e duni wainhira oknum F-FDTL ida halo krimi membru ne’e sei hetan sensaun.

“Maibe la’os hotu-hotu F-FDTL, mais ne’e ema individu ou oknum, sei sira komete salah ruma, sira halo violasaun ruma, ne’e nafatin prosesa tuir lei. Prosesu sira tuir lei katak sei sira halo violasaun, hahalok ida krimi antaun sira iha prosesu administratifu iha sira nia institusaun laran, maibe mos la taka dalan ba sira atu tuir prosesu judisial” dehan deputada Camelita Caitanu Moniz, iha PN, (04/11).
Tuir nia, maibe F-FDTL nudar lutu estadu nian, forsa ne’ duni wainhira sira halo violasaun ruma ema sira vitima ou povu laran taridu.

“Tanba F-FDTL maka povu nia neon metin, sira maka povu nia fiar, katak atu fo siguransa ba povu tomak nia moris, pur ezemplu F-FDTL halo siguransa iha fatin ruma ita senti seguru” dehan nia.