- Publika iha: 11 Dezembro 2012
“Luta ba ida ne’e ami nafatin la’o e agora dadaun ami hato’o tiha karta ida ba ita nia Prezidente da Republika oinsa mak estadu bele ratifika konvensaun ida ne’e ho nia protokolu,” hateten Program Manager Edukasaun Direitus Umanus iha Asosiasaun Hak, Manuel Monteiro Fernandes, (04/12), iha Farol, Dili.
Asosiasaun Hak mos husu ba estadu Timor-Leste no Indonezia atu julga autor ba krime umanidade ne’ebe akontese iha 1975 to’o 1999 iha tribunal internasional.
“Maske kleur maibe ami la lakon esperansa katak loron ida kriminozu sira ne’e bele julga sira iha tribunal internasional, tanba iha relatoriu Comisaun Verdade e Amizade ne’e rekomenda ba estadu rua ne’e atu julga autor sira iha tribunal internasional,” program Manager Asosiasaun Hak ne’e reforsa.
Tanba ne’e hakarak ka lakohi, estadu Timor-Leste tenke ratifika Konvensaun kona ba ema lakon ho obriga ne’e (penghilangan orang secara paksa-red).
“Hau hanoin estadu Timor-Leste iha obrigasaun atu buka nafatin ema sira ne’ebe lakon tanba funu tanba okupasaun Indonezia, e importante liu mak tenke iha baze legal ida, para kompleta ita nia konstituisaun,” apoia Deputadu Aniceto Guterres Lopes.
Alende ne’e family vitima ne’ebe sira nia ema lakon iha tinan 1985, husu mos ba estadu atu buka tuir ema sira ne’ebe to’o agora la hatene sira nia paradeiru.
“Hau nia maun rasik lakon iha tinan 1985, iha momentu ne’eba bapa military Indonezia ida mak lori mais ami familia tomak to’o agora la hatene, mate ka moris ami seidauk hatene, tanba ne’e husu ba estadu Timor-Leste no Indonezia atu buka tuir no julga autor kriminozu ba iha tribunal,” sujere Familia Vitima, Albina Marcal husi Lospalos ne’e.
Entretantu bainhira jornalista tenta konfirma asuntu ne’e ba iha Xefe EStadu, Taur Matan Ruak maibe Prezidente rasik la fo nia komentariu ba media.
“Deskulpa ita nia Prezidente ansi los atu ba tuir enkontru iha fatin seluk, ne’ebe dala ida tan deskulpa nia labele atende ita bo’ot sira,” hateten Ministru Negosiu EStranjeiru, Jose Luis Guterres ne’ebe akompanha hela Prezidente Taur, hafoin abertura Konferensia Internasional atu kombate Trafiku Feto, iha Salaun MNE Pantai Kelapa, Dili.