Quarta, Outubro 28, 2020
Total visitors: 530672

Deputadu husi Parlamento Nasional lamenta ho asaun FALINTIL-Forsa Defesa Timor-Leste (F-FDTL) halo, hodi serku rezidensia sidadaun Timoroan ida inisial AF nian, ligado ba asaun pasifiku ne’ebe grupu Rezistensia Nasional Defende Justisa no Konstituisaun (RNDJK) intensaun halo iha kapital Dili, tamba asaun F-FDTL limita ona liberdade sidadaun nian iha estado direito demokratiku Timor-Leste.

Deputadu husi Parlamento Nasional lamenta ho asaun FALINTIL-Forsa Defesa Timor-Leste (F-FDTL) halo, hodi serku rezidensia sidadaun Timoroan ida inisial AF.

Deputado Patriocino Fernandes hateten Timor-Leste estado demokratiku no bainhira uza ona forsa hodi halo serko ba sidadaun ida nia uma, ne’e lamerese, tanba Timor-Leste la’os ditadura.

“Ita triste bo’ot ba ita nia pais. Aban bainrua, sidadaun sira sei tauk hodi halo kontrolo social iha nasaun demokratiku ne’e,” Deputado Fernandes hateten.

Tanba ne’e nia dehan, asaun ne’ebe mak F-FDTL halo hodi serku sidadaun inisial AF nian uma ne’e signifika sira hamate ona liberdade sidadaun sira nian hodi espresa sira nian hanoin ligado ba situasaun rai laran.

“Tanba ne’e parlamento nasional, ita lamenta ho hahalok sira ne’e atu akontese iha nasaun demokratiku ida ne’e,” nia hateten.

Nia dehan, asaun ne’ebe F-FDTL sira halo ne’e hatudo imagem ne’ebe mak la diak ba nasaun Timor-Leste tanba hahalok ida ne’e so akontese deit iha nasaun ditadura sira.

“F-FDTL ne’e nudar lutu nasaun, nia papel atu hare seguransa ba nia povu rasik la’os atu hanehan nia povu,” Deputado Frenandes salienta iha parlamento nasional.

Entretanto, Porta-vos Polisia Nasional Timor-Leste (PNTL), Arnaldo de Araujo hateten polisia nafatin fo seguransa ba sidadaun sese deit atu bele kria estabilidade ida ne’ebe mak diak.

“Ligado asaun pasifika ne’ebe mak atu realiza husi Rezistensia Nasional Defende Justisa no Konstituisaun (RNDJK) ne’e polisia kopera ona hodi fo seguransa, nune’e labele mosu asaun anarkia iha asaun ne’e rasik, iha dia 4 setembro ne’e. Maibe RNDJK rasik kansela ona asaun pasifiku ne’e tanba kestaun seguransa,” Porta-vos PNTL Arnaldo hateten.

Enkuanto, konaba asaun ne’ebe mak F-FDTL halo hodi asegura rezidensia sidadaun Timoroan inisial AF nia uma ne’e, komando PNTL lakoi fo komentario tanba sira la iha kordensaun ho F-FDTL.

Iha parte seluk, Diretor Ezekutivo Belun, Luis Ximenes espresa preokupasaun ho atuasaun F-FDTL hodi ba halo serku ba uma sidadaun Timoroan ida.

“Sosiedade sivil hare katak prezensa forsa nian iha rezidensia [AF] ne’e sai prekupasaun bo’ot ba publiku. Tanba sa mak sira halo serku iha ne’eba. Ita hare asaun ne’ebe mak [AF] realiza ne’e mos la iha impakto bo’ot,” nia hateten.

Tanba ne’e nia dehan, tuir lolos ne’e PNTL mak tenke halo seguransa la’os F-FDTL mak halo tuir lei ne’ebe mak hakerek ona iha Konstituisaun RDTL.

“Ita nia lei atu asegura seguransa interna ne’e papel Polisia Nasional Timor-Leste (PNTL) nian, la’os F-FDTL nian papel,” nia hateten.

Tanba ne’e nia dehan, tuir lolos ne’e prezensa F-FDTL la merese iha fatin refere, tanba la detekta evidensia ruma ne’ebe mak ligado ba akto terorista ka arma ruma ne’ebe amiasa makas no deklarasaun ne’ebe mak sidadaun inisial AF hato’o ba publiku durante ne’e.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04