Governu Entrega Arma Militár Tipu 3 Ba F-FDTL

Governu liuhusi Ministériu Defeza entrega armamentu tipu tolu hanesan Matralladora, Pistola Glock no Munisoes ba Falintil-Forsa Defeza Timor-Leste (F-FDTL) hodi moderniza instituisaun no utiliza ba nesesidade institusional.'

Ministeru Defeza Kontra Almirante Donaciano Costa Gomes “Pedro Klamar Fuik”, dehan, armamentu ne'ebé sosa hodi entrega ba militár ne’e, tanba governu iha obrigasaun hodi halo investimentu ba militar atu moderniza nune’e F-FDTL bele dezenvolve a'an di’ak liutan no sai instituisaun militar ne’ebé servi estadu no povu ho profisional.

"Ita entrega tan armamentu militár modernu tipu oin tolu hanesan, Matralladora, Pistola Glock no Munisoes hodi moderniza Falintil-Forsa Defeza Timor-Leste (F-FDTL),” nia dehan.

Nia dehan, tipu armamentu militár ne’ebé governu entrega kompostu husi matralladora M249, Matralladora M60E6, no munisoes ho tipu bala Real M4, Bala Real ho pita, bala Real 7.62 x 51 MM, Bala Real ho Pita 7.62xMM, bala Pistola Real Glock 45, Bala Pistola Real Glock 23, bala Simulada 5.56×45 no bala Simulada ho Pita 5.56×45 MM.

"Arma hirak ne'e utiliza hanesan, mini ou M249 Matralladora Lijeira atu kompleta organika iha estrutura kombate nian, ita mós entrega M60 Matralador material semi-pezadu. M60 ne’e nia funsaun atu destroi inimigu nia posizaun kuandu sira iha defensiva ruma atu tama mai ita-nia rai, ita haruka ita-nia ekipa atu sobu. Depois ita mós entrega Pistola Glock ualu (8) no munisoes," Ministru Defeza Kontra Almirante Pedro Klamar Fuik dehan.

Nia dehan, armamentu militár ne’e governu halo akizisaun uza Orsamentu Jeral Estadu (OJE) ne’ebé preve ona iha lei programasaun militár nian.

“Ha’u husu militár sira atu kuidadu sasan sira ne’ebé governu entrega tenke utiliza ho responsabilidade," nia informa.

Entretantu Xefe Estadu Maiór Jenerál F-FDTL, Tenente Jenerál, Domingos Raul “Falur Rate Laek” dehan, armamentu ne'ebé governu fó ne'e hodi dezenvolve instituisaun F-FDTL sai forsa ne'ebé modernu.

“Ha’u husu militar sira atu kuidadu sasan sira ne’ebé governu fó, utiliza ho responsablidade nune’e ita bele uza iha tempu naruk nia laran, tanba la fasil ba ita hodi hetan armamentu hirak ne'e," nia saliente.

Nia mós fó agradesimentu ba esforsu governu nian hodi tau matan ba instituisaun F-FDTL hodi dezenvolve sai Forsa modernu.