Quarta, Fevereiro 19, 2025

Vise-Primeiru Ministru, Ministru Koordenadór Asuntu Sosial no Ministru Dezenvolvimentu Rurál Habitasaun Komunitária Mariano Assanami Sabino, entrega ambulánsia lima (5) ba Servisu Nasional Emerjénsia Ambulánsia Médiku (SNAEM), tanba ne’e tenke kuidadu didiak ambulánsia hodi bele uza ba tinan naruk.

Vise-Primeiru Ministru, Ministru Koordenadór Asuntu Sosial no Ministru Dezenvolvimentu Rurál Habitasaun Komunitária Mariano Assanami Sabino, entrega ambulánsia lima (5) ba Servisu Nasional Emerjénsia Ambulánsia Médiku (SNAEM).

Nia hateten, tinan ida ne'e governu hola ona Ambulánsia 5 hodi apoiu servisu ambulánsia nian, tanba ne'e husu atu kuidadu sasan sira-ne’e atu nune’e bele uza ba tinan naruk.

"Tinan 2024 ita hola ambulánsia hodi apoiu saúde, tanba ita hatene katak sistema saúde ne’e importante tebes ba ita-nia moris, tanba husu atu bele kuidadu ambulánsia sira-ne'e atu ita bele uza ba tinan naruk," dehan Vise-Primeiru Ministru, iha salaun Palácio da Sinzas Caicoli, Díli.

Nia hatutan, tinan ne'e governu hola ona ambulánsia 5 no tinan oin 2025 sei hola tan 5 no sei presiza tan, hodi kompleta tan iha 2026.

"Tinan ida-ne’e ita hola ona ambulánsia lima, tinan oin mai ita sei hola tan ambulánsia lima hodi apoiu servisu ambulánsia nian," nia esplika.

Iha fatin hanesan Diretór Jeral SNAEM Simplicio Amaral de Deus hateten, Governu tinan ida ne’e preve ona orsamentu ba SNAEM hamutuk $2.400.103,928 ba hola tan ambulánsia 5 hodi apoiu ba munisípiu sira.

"Governu propoin orsamentu no liuhusi Parlamento Nasional preve ona orsamentu ba SNAEM hamutuk $2.400.103,928 dolar Amerikanu hodi hola tan ambulánsia atu nune’e bele apoiu ba munisipiu sira," nia dehan.

Nia hatutan, ambulánsia iha 13 munisípiu inklui RAEOA balun kondisaun la di’ak, tanba ne'e presiza aumenta tan ambulánsia hodi nune'e bele apoiu saúde iha munisípiu.

Nia salienta liuhusi ambulánsia 5 ne'e bele ajuda ona SNAEM hodi halo servisu di’ak liutan hodi serbí povu ho di’ak.