- Publika iha: 25 Novembro 2024
Joventude sira tenke konsidera luta Herois sira-nian liuhusi kontribuisaun ba dezenvoliventu Timor-Leste nian iha futuru.
Ministériu Juventude no Desportu Arte no Kultura liuhusi Sekretáriu Estadu Arte no Kultura (SEAK) Jorge Cristovão da Silva dehan, joven sira iha papel atu valoriza, luta heroi sira-nian, tanba uluk sira luta ba libertasaun patria no agora tempu to'o ona atu joven sira luta ba dezenvoliventu.
"Ita husu joven sira tenke esforsu an buka meius oi-oin oinsá bele luta dezenvolvimentu rai ida ne'e iha futuru hodi valoriza luta heroi sira nian," nia hatete.
Nia dehan, joven la'ós buka hemu tua lanu kria problema tun-sa'e kria grupu ilegál sira hodi halo ema seluk sai vítima, maibé tenke luta hodi dezenvolvimentu Timor-Leste nian.
"Alin joven sira tenke estuda makaas hodi kompete, tanba governu fó oportunidade lubuk ida liuhusi apoiu ba grupu foinsa'e sira hodi kria programa halo negosiu, ida-ne'e mós parte ida kontribui ba dezenvoliventu," SEAK Cristovão dehan iha CCD.
Nia dehan, joven sira tenke esforsu, tanba governu sempre apoiu hodi luta ba dezenvoliventu nasaun nian, alende apoiu grupu juventude sira nune'e mós investe iha área rekursu humanu, buat sira-ne'e hodi valoriza luta heroi sira-nian ba libertasaun nasionál.
Iha fatin hanesan Prezidente Conselho Nasionál Juventude Timor-Leste (CNJTL) Maria Dadi Magno dehan, estadu Timor-Leste rekoñese luta juventude nian huhu husi inisiu organizasaun juventude sira hotu no Loriku-Asu Wain sira-nia luta ba libertasaun nasionál.
"Juventude sai fatór importante hodi kontribui ba dezenvolvimentu nasaun doben ida-ne'e nian, tanba ne'e mai ita hotu husik tiha hahalok ne'ebé mak lori impaktu ladiak ba dezenvoliventu nasaun nian no fokus de'it ba ida ne’ebé mak kontribui ba dezenvoliventu atu nune'e ita bele valoriza sira-nia luta," nia hatete.
Nia dehan, husu ba joven sira hotu atu hamutuk kria paz no estabilidade hodi valoriza dignidade heroi sira-nia luta ba nasaun nian ukun rasik an.
Entertantu Joven Jefarina da Costa Tilman dehan, nu'udar joven hakarak lao tuir heroi sira-nia ain-fatin hodi kontinua saida mak sira halo ona ba rai ida-ne'e.
"Joven labele buka problema de'it tenke enkoraja malu hodi bele kontribui ba dezenvolvimentu," nia hatete.