Governu Finaliza Ona Konstrusaun Kampu Futeból Multifunsaun Becora

Governu liuhusi Ministériu Juventude Desportu Arte no Kultura (MJDAK) finaliza ona konstrusaun Kampu Futeból Multifunsaun iha Becora ne'ebé apoiu husi KOICA (Korea International Cooperation Agency).

Ministru MJDAK Nelio Isaac Sarmento hatete, kampu futeból ne’e apoiu husi KOICA no konstrui husi kompañia CHLN Timor Unipesoal Lda, iha tinan 2022 liuba no sei entrega ba governu iha fulan Jeneiru tinan 2025.

“Ita finaliza ona Konstrusaun Kampu Futeból Multifunsaun Becora, ita sei inagura iha fulan Janeiru 2025, nune’e ita bele utiliza ona ba hala’o atividade desportu liu-liu futeból,” nia dehan.

Nia dehan, konstrusaun kampu ne'e mak empreza CHLN Timor Unipesoal Lda no KOICA mak toma konta, maibé halo moru protesaun hodi hale'u kampu ne'e kompañia lokál Zenith Corporation Unipesoal Lda, mak sai vensedor nune'e sira mak responsável ba moru protesaun, dranajen no filtrajen ba bee iha kampu ninin ho orsamentu $ 836,036.59.

“Kompañia lokál ita nian mak toma konta ba pagar ne'e. Dadaun ne'e sira kontinua halo pagar para taka tiha nune'e ema labele tama sai iha ne'e, udan karik bee labele tama mai iha kampu ne'e,” nia hatete.

Nia informa kampu ne'e kompleta ho dormitóriu, bele akomula atleta selesaun sira, fasilidade ne'ebé Governu sei kompleta mak material ba GYM, armáriu iha dormitóriu laran no kama ba jogadór sira atu deskansa.

Enkuantu konstrusaun ba kampu refere kobre pakote ho kampu tolu seluk hanesan, Bintang Bidau, Kampung Alor no Comoro ho orsamentu hamutuk millaun $2.4. Iha neʼebé konstrui husi empreza CHLN Unipesoal Lda.

Entretantu Joventude Secario Martins dehan, kampu ne’e nesesidade tebes atu bele realiza atividade desportu sira liu-liu iha desportu Futeból.

“Ita haree joven barak mak iha talentu di’ak kona-ba Futeból, maibé atu asesu ba kampu hodi treinu ne’e mak susar, tanba kampu ne’ebé iha limitadu tebes,” nia dehan.

Tanba ne’e nia husu atu governu bele konstrui mós kampu Futeból to’o iha uùnisípiu sira labele iha de’it nasionál, tanba joven barak iha área rurais joga di’ak tebes no sira la iha oportunidade hodi asesu mai Dili.