- Publika iha: 19 Junho 2013
Internasional Republican of Institute servisu hamutuk ho Asosiasaun Hak hala’o programa rona povu nia lian iha Sub-distritu Maliana, Distritu Bobonaro.
Diretor Ezekutivu Asosiasaun Hak, Rogerio Vicente Viegas hateten, programa ne’e hala’o hodi rona difikuldade ne’ebe durante ne’e povu infrenta no iha programa ne’e tenke mos involve Membru Parlamentu Nasional hodi rona preokupasaun husi povu.
“Program ne’e ami hala’o ona iha Distritu Manatuto no agora iha Maliana, no involve deputadu sira, no tuir planu aktividade ne’e sei halo iha distritu hotu iha teritoria,” dehan Diretor Ezekutivu Asosiasaun Hak, Rogerio Vicente Viegas, foin lalais, iha Maliana.
Nia hatutan, durante ne’e populasaun ne’ebe hela iha area rurais hetan difikuldade bo’ot atu informa sira nia lamentasoen no preokupasaun direitamente ba nai ulun sira.
“Entaun liu husi program ne’e sira ne’ebe hasoru direitamente deputadu sira no bele hateten saida maka sira infrenta iha sira nia suku no aldeia no distritu,” dehan Diretor Viegas.
Iha fatin hanesan Deputadu Mateus de Jesus ne’ebe partisipa iha enkontru ne’e, sente haksolok no konsidera programa ida ne’e kapas.
“Tanba bele rona povu nia preokupasaun direitamente no sira nia preokupasaun ami sei levanta iha plenaria atu nune’e bele hato’o ba governu para bele toma atensaun,” dehan Deputadu de Jesus.
Entretantu Fernando, nudar komunidade ne’ebe maka tuir programa ne’e, sente kontente tanba alem de hato’o sira nia preokupasoens, sira mos bele hasoru direitamente Deputadu sira. “Tanba ami iha area rurais ami nia preokupasaun barak los, kona ba estrada, eletrisidade no buat seluk tan, maibe liu husi program ne’e hau kontente tanba bele hato’o ona hau nia difikuldades ba membru parlamentu ne’ebe maka marka prezensa iha ne’e, atu nune’e sira bele hatene saida maka akontese iha baze,” dehan Fernando ho kontente.