Komunidade Poena Asesu Ona Ba Bee Moos

Hafoin tinan barak nia laran la hetan bee  mooos, dadaun ne’e komunidade (uma kain 435) Aldeia Poena, Suku Humboe distritu Ermera asesu ona ba bee moos hafoin tinan barak nia laran.

Prosesu kanalizasaun bee moos ba iha aldeia Poena ne’e , tanba servisu hamutuk Unicef ho Uniaun Europeia no Governu Timor-Leste.

Xefe Suku Humboe,Pedro Salsinha, sente orgulhu sira nia aldeia iha ona bee moos, tanba desde okupasaun Indonezia mai to’o ukun aan foin mak hetan asesu ba bee moos e durante ne’e sira konsumu deit bee mota.

“Ami sente orgulhu ba ajudus tomak ne’ebe mak ita bo’ot sira fo ba ami tanba ami uluk Aldea Poena rasik situasaun defisil tebes ba bee,populasaun sira kuru bee ho distansia do’ok, la’o oras ida ka rua nia laran,”  dehan Xefe Suku Salsinha, hafoin halo inagurasaun bee moos, iha Aldea Poena, (25/04).

Nia dehan, komunidade la presiza ona la’o do’ok tanba bee besik kedas sira nia uma hun, tanba ne’e fo agradese ba Uicef, Uniaun Europeia no governu Timor-Leste ne’ebe dada ona bee moos ba sira.

“Uluk sira hariis dala ida,dalaruma mos sira la hariis, oan sira dalaruma ba eskola la haris,hader mai hamos deit oin mak ba eskola maibe agora lae,bee besik ona sira loron ida sira hari’is dala tolu,hari’is dala rua,” tenik Xefi Suku ne’e ho kontente.

Entretantu Reprezentante Unicef iha Timor-Leste, Hongei Wei Gao, kongratula ba komunidade Aldeia Poena, Suku Humboe ne’ebe esforsu an hala’o servisu ne’e to’o remata.

“Hanesan ita hatene katak ohin ita sae to’o ba rai laletek ne’eba ita hare ona katak tanke bee iha ne’eba,ne’e hatudu katak bee moos besik ona ba komunidade iha aldeia ne’e nia laran,” tenik Reprezentante Gao.

Nia mos apela ba komunidade sira atu asegura nafatin tanke bee moos ne’ebe iha,” ba ita bo’ot sira nia futuru,” Gao apela.

“Hau mos rona katak be’e ne’e mos ita bo’ot sira kanaliza ona ba iha eskola tanba ne’e husu mantein sistema iha ita bo’ot sira nia aldeia ne’e hare taumatan mos ba sistema nebe kanaliza ona ba iha eskola ne’eba atu nune’e labarik sira mos bele aproveita,”Gao hato’o.

Iha fatin hanesan Sekretariu Estadu,Agua no Urbanizasaun,Elias Pereira Moniz  informa katak,aktividade saneamentu,bee no hijiene aktividade ida ne’ebe ki’ik baziku liu,orsamentu ladun bo’ot hanesan infrastrutura ninian maibe nia importansia bo’ot liu.

“Tanba saida mak hau dehan nune’e tanba laiha bee laiha moris,” dehan Sekretariu Estadu Moniz.

Nia mos fo parabens ba komunidade Poena,Suku Humboe tanba partisipasaun komunidade refere la’o masimu to’o projetu bee moos ne’e remata.

“Kuandu sem partisipasaun ita bo’ot sira mak aktividade ida ne’e la la’o tanba partisipasaun importante,” SE Moniz hato’o.

Projetu bee moos ne’e hala’o ho orsamentu hamutuk $64,125.37 dolar no kontribuisaun husi komunidade ho orsamentu hamutuk $8,196.40, enkuantu  osan ne’ebe mak mai husi doadores hamutuk $55,928.97